Footer

Partisipante ti Feria de Candon, naikkan insentibo

CANDON CITY – Naikkan tunggal barangay ditoy siudad iti sag-P100,000 kas insentibo iti agtultuloy a suportada iti tinawen a pannakarambak ti Feria Exposicion de Candon 2008.

Kinuna ni Singson a mausar ti inyawatna a gatad tapno mapapintas pay dagiti produkto manipud kadagiti duapulo ket tallo nga ili iti maikadua a distrito ti Ilocos Sur.

Iti panaglukat ti parambak idi Nobiembre 29, kinuna ni Singson a napateg unay ti tinawen a selebrasion kas panglagip iti tawen 1892 a kaunaan a pannakaisayangkat ti trade fair iti Candon City.

“Nasuroken a maysa a siglo daydi ket masapul nga agtultuloy ta babaen itoy a trade fair, mainspirar dagiti taga-ditoy a mangpasayaat pay kadagiti produktoda,” innayon ti diputado.

Kinuna met ni Gov. Deogracias Victor “DV” Savellano a babaen ti Feria de Candon, nadaras a magun-od daytoy a siudad ti kalikagumna nga agbalin a prime city iti rehion I.

Malaksid iti trade fair, naisayangkat ti job fair a nakaitanggayaan ti nasurok 1,000 a jobs a mabalin nga aplikaran dagiti agsapsapul iti trabaho.

Naangay pay itay Nobiembre 30 ti maysa nga scholar fair a nakapilian ti 200 nga aplikante kadagiti kurso a Nursing (50), Architecture (50), Engineering (50) ken Culinary Arts (50).

Agbalin nga scholars ni Cong. Singson dagiti napili ket libre ti panagbasada.#