Party list system: maab-abuso pudpudno nga intension ti linteg (Tuloyna)

Sumagmamano nga aldaw sakbay ti eleksion idi Mayo 10, 2010, imbasura ti Commission on Elections ti dua a disqualification cases nga impila da Liza Maza ken Satur Ocampo ken ti party list group a Bayan Muna maikontra ken ni Diputado Juan Miguel “Mikey” Arroyo, numero uno a nominee ti Ang Galing Pinoy party list, grupo a mangibagi kadagiti agpaspasada iti traysikel ken security guards.

Iti petision da Maza ken Ocampo, kinunada a saan a miembro ni Arroyo iti sektor dagiti drayber ti traysikel ken security guards ken maysa a bogus a party list ti Ang Galing Pinoy.

Ngem segun iti Comelec, awan ti merito ti kaso nga impila da Maza ken Ocampo a mangdiskualipika ken ni  Arroyo agsipud ta natun-oyan met ni Arroyo amin dagiti kualipikasion para iti maysa a party list nominee kas intuding ti RA 7941 wenno Party List System Act.

Kas sagudayen ti Seksion 9 ti RA 7941, dagiti sumaganad dagiti kualipikasion para iti kandidato ti party lists: natural born citizen ti Pilipinas; rehistrado a botante; residente iti Pilipinas iti saan a nakurkurang ngem maysa a tawen sakbay ti kaaldawan ti eleksion; makabasa ken makasurat; bona fide member ti partido wenno organisasion a tarigagayanna nga ibagian iti saan a nakurkurang ngem 90 nga aldaw kasakbayan ti aldaw ti eleksion; agtawen iti saan a nababbaba ngem 25 ken saan a nasursurok ngem 30 iti aldaw ti eleksion.

No maibasar iti ngato, awan duadua a kualipikado ni Dip. Arroyo. Kasta ngamin kasimple dagiti kualipikasion para iti maysa a party list candidate.

Maysa ngarud ti Ang Galing Pinoy kadagiti improklama ti Comelec a nangabak iti napalabas nga eleksion. Ngem maysa nga aldaw kalpasanna, imbabawi ti poll body ti rebokasion ti proklamasionna mainaig iti AGP.

Nupay kasta, kinuna ti Comelec a saan a mapalubosan ni Dip. Arroyo nga agtugaw a kas mangibagi iti AGP agsipud ta adda kuestion mainaig iti nominee.

Iti kaudian a desisionna, kinuna ti Comelec a naipila ti kaso maikontra iti nominee, saan iti organisasion, ngarud improklamana ti party list organization, saan a ti nominee.

Agsipud ta saan a makatugaw ni Arroyo agingga iti a saan a maresolbar dagiti kaso a naipila maikontra kenkuana, kinuna ti Comelec nga adda opsion ti AGP a mangsukat ken ni Arroyo babaen dagiti sabali pay a nominees.

Manamnama metten a maiproklama dagiti dadduma pay a nangabak a party list a kas iti 1-UTAK, Advocacy for Teacher Empowerment Through Action Cooperation and Harmony Towards Educational Reforms (A Teacher), ken Butil Farmer Party (BUTIL) nupay adda pending a diskualipikasion maikontra kadagiti nominees dagitoy.

Pagarigan ti 1-UTAK, nainagan ni dati nga Energy Secretary Angelo Reyes a numero uno a nomineena a mangibagi kadagiti tsuper.

Napilaan ni Reyes iti diskualipikasion gapu ta kas kinuna ti Pinag-isang Samahan ng mga Tsuper at Opereytor Nationwide (PISTON), saanna a salakniban ti interes dagiti drayber ken operators no di dagiti dadakkel a kompania ti lana.

Naitantan pay ti pannakaiproklama ti walo a sabali pay a party lists gapu adda pending a petision para iti pannakakansela ti rehistrasionda. Karaman ditoy ti Ako Bicol Political Party (Ako Bicol), Buhay Hayaan Yumabong Party-list (Buhay); 1st Consumers Alliance for Rural Energy (1-CARE); Citizens’ Battle Against Corruption (CIBAC); LPG Marketers Association, Inc. (LPGMA); Ang Asosasyon Sang Manguguma Nga Bisaya-Ow Mangunguma, Inc. (MBIS-OWA); Association of Philippine Electric Cooperatives (APEC); ken Alliance for Nationalism and Democracy (ANAD)

Madakamat ditoy nga adda imparuar ti Comelec a resolusion a mangbilin kadagiti party list groups a mangidatag iti documentary evidence a mangpaneknek a talaga a karaman dagiti nainominar kadagiti marginalized ken saan unay a maireprepresentar a sektor a kayatda nga ibagian.

No amirisen a nalaing ti Comelec Resolution No. 8807, masaludsod  no kasano a maibaga a pudpudno a karaman iti marginalized a grupo dagiti nainomar a mangibagi kadakuada idinto a dadakkelda a negosiante, nangato ti saadda iti gobierno, addaanda iti nangato a pagannongan kadagiti ahensia ti turay, dadakkel a politiko!

(Adda tuloyna)