Pasahero, nasugatan iti pannakabansag ti bus

SANTA MARIA, Ilocos Sur – Nasugatan ti pasahero idinto a nabuong ti tawa ti maysa a minibus gapu iti pannakabansagna ditoy nga ili idi Disiembre 29.

Nasugatan ni Charlie Abuy, 40, residente iti Poblacion West, Nagbukel, Ilocos Sur, idi limsut ti bato iti tawa a nakapuntaan ti mugingna.

Segun iti report, binansag dagiti di nabigbig a tattao ti MR Travel Mini Bus a minaneho ni Primitivo Camarillo, 45, ken residente iti Mabilbila Sur, Santa Ilocos Sur bayat ti panagdaliasatna iti Barangay Baliw Laud ditoy nga ili ket limsot ti bato iti tawa a nakatiruan ti biktima.

Naireport pay a nabansag met ti RCJ Bus a minaneho ni Erich Castro, 39, residente iti Laoag City a nakabuongan ti tawa daytoy. #