sinursuran-banner-sqSinursuranNi Jobert M. Pacnis

Pasamak a Diak Ninamnama

Ni Jobert M. Pacnis

Kolum : Sinursuran

(Maikadua a paset)

 

Ngem inrupirko ti kalintegak. Idi damo, naka-PM-ko ti maysa kadagiti kakaduada nga awagantayo iti Madam L. Babalawenna met dagiti liderda ta kasta ti napasamak iti pasalip. Agingga iti nakaisawang iti kontra kadagitoy.

Ngem idi agtanoy ket bumara a bumara ti panangbanatda kaniak, rimmamanen ni Madam L. Baliktadennakon. Ad-addan a siak ti dakes. Out of CONTENT-ka (a CONTEXT koma), insagpaw payen ‘tay aginlalaing a prinsipal (a dina met ammo ti isyo).

Gapu ta kasta a baliktadennakon ni Madam L, inruarkon dagiti PM-na. Ket ditoy a naalak ti simpatia dagiti dadduma a nakasagang kadagiti patangan.

Nalawag itan ti amin, nakuna payen dagiti dadduma. Maawatanmin ti side-mo, sir, kinunada. Ket kiniddawda kadagiti nagkomkomento nga awan met ti basehanda a tumalnada koman ket agkiddawda iti dispensar. Ngem awan. Nagbaliw payen iti FB account dayta a madam L tapno mapukaw ngata ti nai-PM-na a pammabalaw kadagiti kakaduana. Pagdaksanna, kas nasaokon, nai-save-kon ket isu ti nairuarkon iti depensak.

Nagangayanna, isudan nga agkakadua, mangipatpataray iti journal ti agaangat. Adun dagiti pinnadakesda iti tunggal maysa. Nagiruardan kadagiti bukodda a buyok.

Anian, nagsasangan daydi a narugiak a pasamak. Agingga a tirtiraennakon iti blog-na dayta a mannurat Y. Pangkonsolasion la kano daydi entryk nga impaipablaakna lattan iti journalda.

Anian! Saan met a dayta ti isyo. Pagtamtamdak a mannurat idi damdamoak pay laeng itoy a pagesman ngem kasta met gayam panagsasaona!

Agingga a nakaawatak iti mensahe a nagiposte kano iti FB ni mannurat Y nga agkidkiddaw nga isardeng koman ti isyo iti FB. Agpadpadispensar. Ti dakes, di pay bimmara ti post-na, ket diak pay naka-log-in, pinugasna kano met laeng.

Saan a maaklon ti riknana ti agpadispensar?

Ngem iti email-ko, nagparang met laeng daytoy a post-na (nupay iti FB, attachment unavailable, kunana). Agpayso, kidkiddawenna ti panagsardengen dagitoy a patangan. Kunana:

Jobert, pudno nga adda panagliway. Hustokayo. Ammok a responsablekayo met a mannurat ket dumngegkayo met kadagiti palawag. Isardengtayo koman dagitoy ta awan met la ti pagturturonganda no di ti panagdidinnadaeltayo. Ania ti maganabtayo kadagitoy? Kayatka a kasarita iti personal no ania ti kayatmo a mapasamak. Agpadispensarak koma kenka. Talaga a biddut daydiay. No kayatmo umayak a mismo dita (innagananna ti ilik). Isardengtayo koman daytoy. Nasayaat nga usarentayo dagiti orastayo nga agsurat kadagiti daniw, sarita ken amin a kita ti genre a mabalin nga agbalin nga obra maestro iti lengguahetayo. We have things in common: the culture and the language. Apay aya a kastoy metten ti diskutirtayo. Awan met ti perpekto a tao wenno aramid. I am now closing the issue or issues.—manong mannurat Y.

Nalpas koma ditan ti amin ngem saan met a sincere iti im-post-na, ta dina pinagbayag. Pinugasna a dagus. Sa intuloyna met la ti nangtira kaniak kadagiti sinuratna iti blog-na.

Iti maysa manen kadagiti sinuratna, dinakamatna ti pasken nga intuyangda. Nakabalballigi kano. Innagananna pay dagiti nangabak iti pasalip. Ti nakakadkadlaw: awan ti naganko a dinakamatna kadagiti winner.

Kanayonna pay met nga isursurat ti responsible journalism!

Ngem, ala, dinak nauray a nagsao pay. Binay-akon ti isyo a matay iti bukodna a panawen. Uray ta naglemmengen dagiti naginlalaing (ta pinugas metten ni madam L, kas administrator, ti account-da iti FB. A nangaramid iti sabali idi agangay.).

No kaano met nga agsardeng dayta a mannurat Y nga agal-alang-ang latta iti bukodna a laing, diak la ammo. Siuurayak kenkuana ditoy ilimi. No pudno nga adda rupana, tungpalenna koma ti mensahena.

Kadagiti met kakaduada a nangimameg kaniak iti FB, sapay la koma ta makitayonto met laeng ti kinapudno. Isardengyo koman ti agpipinnadakes ta agkakaduakayo met laeng. Saan a kasta nga agbibinnulgarkayo iti buyok.

Didak koma met pabasolen kadaytoy a napasamak iti gungloyo. Dakayo met laeng ti nangsilmot iti bukodyo a pagtaengan.

Ka-Sinursuran, dayta ti pasamak a diak ninamnama, maysa a banag a mangparegta kaniak tapno ituloyko latta ti krusadak nga agsurat/mangisurat laeng iti kinapudno.

Responsible writer.

Sapay koma ngarud ta agtutugmokto met laeng dagiti dana. Ulitek man ngarud: we have things in common: the culture and the language.#