sinursuran-banner-sqSinursuranNi Jobert M. Pacnis

Pasamak a Diak Ninamnama

Ni Jobert M. Pacnis

Kolum : Sinursuran

 

SIMPLE laeng met ti rason no apay a timmabunoak kadayta a taripnong dagiti padak iti pagesman– ti agay-ayam kadagiti balikas tapno mabasa iti lubong  ket makaited iti uray sangkapuling laeng a pakalaglagipan ken adal dagiti mabukelko a nginabras ti kaunggak— tapno madakulapko ken maam-ammok ida nupay sabali ti grupoda iti nakaisigudan a grupo.

Ken tapno awatek metten ti gunggonak a kas maysa a winner iti pasalipda. Aglalo ket agsasaruno ti awis ti maysa kadagiti nangimaton iti pasalip a dumar-ayak la a dumar-ay.

Nupay ammok nga adda dayta di panagkinnaawatan ti baro ken dati (a nagkamengak) a grupo, diak lattan indaddadaneng ta awan ammok a basolko iti immun-una. Saanak met ngata a kagura dayta nagtubo a baro a grupo ta awan pannakainaigko iti isyo a nabayagen nga ibanbandoda. Sa maysa, agpapada met laeng ti panggep: ti pannakatagiben ti nakayanakan a pagsasao.

Yanna a pagdaksan, iti pay laeng facebook, addan dagiti nabasak a negatibo a patangan iti panangabakko iti daniw (Daytoy daydi nasurattayo a nagbaliwbaliw ti pagannurotanna. Nasaok idi a baka di mairaman ti entryk gapu kadayta. Pagyamanan ta sinustinirda ti agduma a press releaseda a nangimaton iti pasalip.). Nagtaud daytoy kadagiti die-hard a kameng dayta a grupo.

“Wen, taga-X (‘tay grupo a nagkamengak) dayta nangabak a maysa. Ta taga-X met dayta maysa a hurado.”

Idi mabasak daytoy, a sinaruno pay dagiti dadduma a nakasaktan iti rikna, diak kayaten a mapan awaten ti premiok. Ngem anian, aya, ta inyunay-unay met ti maysa a coordinator ti pasalip ti itatabunok.

Kuna pay dagita nagpapatang iti facebook, awan kano latta, a, ti tiansada a mangabak ta kasta met nga addaak a pasalsali a nakisalip— a bangolan kanon. Ken kagungloak kano met dayta hurado a maysa.

Sungbatko met: nai-tag ti pasalip kaniak ket iti pagannurotan, silulukat met iti amin ti pasalip. Dina met imbaga a maiparit iti kas kaniak. Sa maysa, agdalan met pay kadagiti editor dagiti entry ta dagiti laeng maipablaak iti dyornalda dagiti kualipikado a maisalip.

Dita koma pay laeng, tininnagdan dagiti entryk. Dida koman impabpablaak tapno di nagngawngaw iti kasta unay dagiti aliporesda.

Nupay ammok a kaslaakto la mailanglangi iti itatabunok (ta sabali ngarud ti grupok), inturturedko ti timmabuno. Kas maysa a delegado, nagbayadak iti registration fee a mapan a sangaribu pisos. Nakaresibo dayta.

Idi addaakon iti sango (a kaduak dagiti isponsor, coordinator ken dagiti hurado ti pasalip, presidente ti gunglo ken publisher ti journal) tapno awatek ti premiok, ania ketdin, aya, ta naitubong ketdin iti makanigid a lapayagko (a puesto ti presidente ken publisher a babai) daytoy:

“Taga-X dayta, madam. Taga-X dayta…” ta inulit-ulit pay ti presidente a kinuna a nagtammengan ti naruar nga isemna. Ebidensia? Ti grupo a ladawanmi! Di mailadawan ti musiigna.

Ngem binay-ak lattan. Diakon nagun-uni. Nalpas ti taripnong a nangabakak pay iti on-the-spot daniw writing contest a naituyang para kadagiti propesional ken agdadamo. Kas iti dati, idi umuliak iti entablado a kas winner manen, addayta manen dagiti nagtatadem nga ikikita.

Iti nasao a taripnong, inur-urayko pay a maiwaragawag ti pasalipda a salaysay (a naistoriakon ditoy). Ngem awan met. Nakapatpatangko pay daytoy mannurat Y a nangitag kaniak iti pasalip ngem awan man la ti naibagbagana. (Basaen laengen kadagiti napalabas nga isyu ti TNM ti napait a napasamak).

Isu nga iti panagawidko, naikannawagko  iti facebook (a pagsalsaludsodak no ania ti binanag ti pasalip) dayta di natuloy a pasalip a ti dakes pay a pasetna, impablaakda lattan daydi entryk nga awan pammalubosko.

Pagdaksanna, nagaambonandak manen dagiti aginlalaing nga alipores dayta a grupo. Rimmamraman payen ti maysa a prinsipal a kaduada a dina met sinimpuon dagiti pasamak. Ngem diak nagsanud nupay adu dagiti below the belt a panangtiradada kaniak (kas koma iti sumilap a mugingko…).

Siguradoka kadi a mangabak ‘ta entrim? adda payen nagkuna.

Nupay kasta, sititibkerak a nakirupangga iti lubong ti facebook nupay agmaymaysaak. Agingga a padpadaksendakon. Nakadanon payen iti punto a kasla awan utangko a naimbag a nakem ta binisitadak kano iti husto (nupay awan pay namasangbay kaniak iti isasangpetko isu a napanak immian iti kabangibang nga ili a yan ti kabagiak) sa ita addaak nga umalang-ang kadakuadan?

(Adda tuloyna)