Pasanay iti DRRM, BPATs, naangay

CABUGAO, Ilocos Sur – Naangay ti panagsanay mainaig iti disaster risk reduction and management ken BPATs iti Cabugao Cultural and Sports Complex, Barangay Rizal ditoy nga ili idi Hulio 23-24 kas panagsagana a sumango kadagiti dumteng a kalamidad wenno didigra aglalo iti isasangbay ti tiempo a matutudo.

Kinuna ni Engr. Nestor B. Somera, focal person ti Municipal Disaster Risk Reduction Management Council-LGU Cabugao, a 3-10 a partisipante tunggal barangay dagiti nagatendar iti pasanay ket yallatiwdanto kadagiti barangayda ti nasursuroda.

Iti mensahena, inyunay-unay ni Mayor Edgar S. Cobangbang, Jr. ti kinapateg ti panagsanay idinto nga indagadagna ti panagkaykaysada amin a mangibaklay iti responsibilidadda nangruna iti sanguanan dagiti dumteng a kalamidad ken pannakaaywan iti urnos ken talna iti barangay.

Iti maikadua nga aldaw, naiyadal kadagiti partisipante a a pakaibilangan dagiti BPATs/tanod mainaig iti first responders and basic investigation report writing, intelligence, basic patrol operation and police intervention technique.