Pasanay iti food manufacturing practices, naisayangkat

VIGAN CITY – Naangay itay nabiit ditoy siudad ti seminar maipanggep iti basic food hygiene ken food manufacturing practices babaen ti panangilungalong ti Department of Science and Technology ditoy probinsia.

Nakipartisipar iti daytoy a pasanay dagiti addaan iti restaurant ken dagiti agar-aramid iti longganisa, ken chichacorn, nangruna dagiti negosio a tinulongan ti DOST.

Kinuna ni DOST provincial officer Ramon Sumabat a naiwayat ti nasao a training tapno maaddaan dagiti agnegnegosio iti restaurant ken agar-aramid kadagiti produkto a kas iti longganisa ken chichacorn iti awareness iti food manufacturing practices.

Inlawlawag ni Sumabat a babaen iti seminar, maammuan dagiti kompania dagiti suroten tapno nadalus, de-kalidad ken safe dagiti aramidenda a makan.

Kinuna ni Sumabat a masapul a suroten dagiti kompania ti Food Safety Act of 2013.

Indagadag ni Sumabat kadagiti kompania a rugiandan nga iwayat dagiti food manufacturing practices tapno masigurado a de-kalidad dagiti produktoda ken safe a kanen dagiti consumers.#