Pasdek negosio, mangala iti barangay clearance

CAOAYAN, Ilocos Sur – Adda dagiti pasdek negosio ditoy a nakaala iti business permitda iti baet nga awan ti clearance manipud iti barangay.

Daytoy ti reklamo dagiti sumagmamano a barangay officials ditoy nga indanonda iti sangguniang bayan ditoy itay nabiit.

Ngem segun iti maysa a konsehal, awan ti ispesipiko a linteg a mangituding iti panagala nga umuna dagiti pasdek negosio iti barangay clearance kas maysa a requirement no mangalada iti business permits iti munisipio.

Kanaig daytoy, kinuna ni Vice Mayor Gemma Padaong nga addan inaramid dagiti dadduma a barangay nga ordinansada mainaig iti panagalaan iti barangay clearance ket daytoy koma ti suroten dagiti sabsabali pay a barangay.

Adda bayadan dagiti asinoman wenno pasdek negosio a mangala iti barangay clearance nga agbalin a pamastrekan dagiti barangay.#