Pasdek para addaan rangkap, naluktan

CABUGAO, Ilocos Sur – Pormal a nalukatan ti Stimulation and Therapeutic Activity Center (STAC) for Children with Disabilities idi Marso 7 babaen ti panagkikinnammayet ti Katipunan ng mga May Kapansanan sa Pilipinas Inc., Danish Society of Polio and Accident Victim ken ti lokal a gobierno ditoy.

Segun iti National Project Director ti Breaking Barriers for Children a ni Venus Ilagan, nairanta daytoy a pasdek para kadagiti ubbing nga addaan rangkap tapno mataming dagiti kasapulan dagitoy a dati ken saan a maipapaayan iti naan-anay nga atension.

Agsanay dagiti mangmanehar iti STAC iti tallo a bulan iti babaen ti grupo ni Ilagan sakbay ti naan-anay a panangipataray dagitoy iti pasdek. Ipaay pay ti BBC ti pondo ti nasao a Center iti uneg ti 18 a bulan wenno agingga iti Agosto 2009 sakbay a maipa-ima iti LGU amin a pakaseknan daytoy a proyekto.

“Masapul ti suporta ti LGU tapno maaddaan ti panagbalbaliw dagiti addaan rangkap ta saan laeng a dagiti pamiliada ti akinresponsibilidad kadagitoy no di pati ti komunidad,” kinuna ni Ilagan.

Naammuan ken ni Mayor DioCaesar Suero a 80 nga ubbing nga addaan rangkap ti nailistan a maipaayan iti tulong babaen ti STAC ket mabalin a manayonan pay iti masanguanan.

Indawatna nga agpatingga laeng iti 18 a bulan ti operasion ti pasdek no di agtalinaed ti sustainability ti proyekto tapno adu ti matulonganda nga ubbing.

Kinuna  ni Gobernadpr Deogracias Victor “DV” Savellano a babaen ti STAC, maikkan iti oportunidad dagiti addaan rangkap nga ubbing a mangpasayaat iti biagda iti laksid ti kaadda ti disabilitiesda.

Immuna a naipasdek idi napalabas a tawen ti maysa nga Stimulation and Therapeutic Activity Center (STAC) para kadagiti addaan rangkap nga ubbing iti Vigan City. (Mancielito S. Tacadena/NBN Vigan)