Pasiente, tinarayanna utangna iti ospital

VIGAN CITY – Maysa a pasiente a saan a makabayad iti ospital a nagpaagasanna ti nanglibas iti utangna.

Nagreklamo iti polis ti maysa a nars ti Polyclinic Hospital a tinarayan ni Evelyn Tabigne, 27, resident ti Puro, Magsingal, Ilocos Sur ti utangna iti ospital iti panagpaagasna iti dua nga aldaw.

Naiserrek ni Tabigne iti ospital idi Setiembre 19 gapu ta marigatan nga umanges ket naituding a rummuar koma iti Setiembre 21 ngem mapapati a naitantan ti pannakapalubosna agsipud ta saan a makabayad iti nagastona iti panagpaagasna iti nasao nga ospital.

Aganay a P9,000 ti bayadan ti pasiente iti ospital.

Naduktalan laengen a linibasan ti pasiente ti utangna idi Setiembre 23.

Iti kallabes, inggunamgunam ni Vice Governor Jeremias “Jerry” Singson ti panagpaagas dagiti umili iti publiko nga ospital iti probinsia agsipud ta basbassit ti magastoda kadagitoy nga ospital.

Kapaliiwan ngamin ni Singson nga adda dagiti mapan agpatulong iti Ilocos Sur Hotline nga umili tapno masulnitan ti utangda iti ospital a nagpaagasanda gapu iti kinadakkel ti singiren ti ospital kadakuada.

Kinuna ni Singson a biddut ti iseserrek dagitoy iti pribado nga ospital agsipud ta adun ti simmayaatan iti serbisio dagiti publiko nga ospital iti probinsia.

Iti sabali a bangir, konkontraen dagiti pribado nga ospital ti implementasion ti RA 9439 a mangibilbilin kadagitoy nga ospital a palubosanda ti pasiente uray saan a makabayad.

Sagudayen iti nasao a linteg a palubosan ti ospital ti pasiente nbga agawid kalpasan ti panagaramidna iti kasuratan a bayadanna ti nagastona iti panagpaagasna iti ospital.

Ngem segun iti Philippine Hospital Association, maab-abuso ti promisory note ta maysa laeng kadagiti sangapulo a pasiente a nagpirma iti kasuratan a bayadanna ti utangna iti ospital ti nagsubli tapno tungpalenna ti karina nga agbayad.

Kinuna ti ospital a daytoy ti dakkel a pakalugianda.

Imballaag pay ti PHAP iti panangiwayatda iti Hospital holiday kas panangipakitada iti panagprotestada iti nasao a linteg ngem saanda met laeng nga intuloy.#