Passporting, job fairs, mailatangan iti pondo

VIGAN CITY –  Dua a resolusion ti naipila iti sangguniang panlalawigan para iti pannakailatang iti pondo para iti panagpasaporte ken pannakaangay iti job fair iti probinsia.

Sagudayen dagiti draft resolution a pinutar ni Vice Gov. Deogracias Victor Savellano ti pannakaangay ti passporting service ken ti pannakaisayangkat ti job fair iti probinsia iti mamindua iti makatawen tapno matulongan dagiti agnaed iti probinsia a kayatda ti mapan agtrabaho iti ballasiw-taaw ken dagiti nagturpos nga awan pay ti panggedanda.

Nairekomenda a maaramid ti panagpasaporte ken job fair iti Marso ken Oktubre tunggal tawen.

Ang-angayen ti gobierno probinsial ti panagpasaporte ken jobs fair ditoy mismo a probinsia tapno bumassit ti magasto dagiti agaplikar iti pasaporte ken panggedan.#