Pastor, balasang, natakawan

CANDON CITY – Nagbalin a biktima ti mapapati a kameng ti Akyat Bahay Gang ti maysa a pastor iti Barangay San Agustin ditoy idi rabii ti Oktubre 12.

Kinurimes dagiti mannanakaw ti laptop ken projector ni Orlando Cadaeg, 48, pastor ti Assembly of God, ken residente iti nadakamat a barangay, idinto a selpon ken kuarta nga agdagup iti P2,000.00 ti natakaw manipud ken ni Noemi Baturi.

Segun iti panagimbestiga dagiti polis, nagna dagiti suspek iti likudan ti balay nga adda laeng iti abay ti kapilia.

Iti pannakaisurat daytoy, di pay ammo ti kinaasino dagiti mannanakaw.#