Pastoral mission, naangay

QUIRINO, Ilocos Sur – Naangay ti Pastoral Mission for Solidarity iti daytoy nga ili idi Mayo 14-16.

Nagkinnamayet ti Defend Ilocos ken ti Ilocos Human Rights Alliance ken iti kooperasion ti United Church of Christ in the Philippines Northern Luzon Jurisdiction Indigenous Peoples Program iti pannakaangay daytoy a mission kas pangsuporta iti pannakirupak dagiti agnaed iti Quirino, Ilocos Sur maikontra iti makadadael a panagminas ken mapapati a militarisasion iti lugarda.

Ti Save Quirino Movement (SQM) ken dagiti residente iti Barangay ti Lamag, Namitpit and Patungcaleo ti nagsangaili iti tallo-aldaw a mission a nakipartisiparan pay dagiti church workers, human rights defenders ken environmental activists.

Naangay ti mission tapno maited ti moral ken politikal a suporta kadagiti komunidad nga agsagsagrap iti panagrigat ken peggad manipud iti naipanurok a panagminas dagiti kompania ken ti saan a matimbeng ken makadadael nga small-scale mining practices a mapapati nga ipupuonan dagiti politiko ken negosiante.

Panggep pay ti mission a patibkeren ti panagmaymaysa dagiti umili maikontra iti makadadael nga operasion ti minas ken panangipaay kadagiti workshops a mangitandudo iti kalintegan pantao ken internasional a linteg a naintaoan iti baet ti kumarkaro a panagrupak iti nagbaetan ti puersa ti turay ken ti tignay a rebolusionario.#