Patrol boat, naited iti Cabugao

CABUGAO, Ilocos Sur – Kas paset ti programana a mangsaluad iti kabaybayan iti probinsia, maysa a patrol boat ti inyawat ti Bureau of Fisheries and Resources (BFAR) iti lokal a gobierno ditoy sadiay Barangay Salomague idi Septiembre 9.

Mismo a sinaksian da Gov. Ryan Singson, 1st District Congressman Ronald Singson, Vice Governor Deogracias Victor Savellano, dagiti bokal a pakaibilangan da Bokal Jeremias C. Singson, Bokal Constante Oandasan, Bokal Baterina, ken Bokal Edgar Yabes, Vice Mayor Deogracias Jose Savellano, dagiti konsehal ti ili ken opisial ti Barangay Salomague ken Dardarat ti pannakabendision ken pannakaiyawat ti patrol boat kadagiti opisial iti coastal barangays ditoy nga ili.

Dimmar-ay pay ditoy da BFAR Regional Director Nestor Domenden, Fishery Officer Belmore Bugaoan, ken kameng ti Philippine Coast Guard.

Naited ti patrol boat babaen ti panangilungalong da Gov. Singson ken ti lokal a gobierno ti Cabugao iti panangidaulo ni Mayor Edgardo S. Cobangbang, Jr. kas paset ti kampania maikontra iti illegal a panagkalap iti probinsia.#