Patrol car, nakursonadaan nga inubor ti dua a baro

MAGSINGAL, Ilocos Sur – Pati patrol car ti polis, saanen a kabuteng dagitoy dua nga agtutubo a kursonadaen nga uboren.

Gapu iti daytoy, nakasuan iti malicious mischief da Eric Padora, 20, baro, ken residente iti Barangay Sta. Monica; ken Jomar Ursua y Guzman, 29, baro, ken residente iti Barangay San Vicente, ditoy.

Naammuan iti police blotter nga idi agarup 7:55 ti bigat ti Enero 10, agdaldaliasat nga agpaabagatan ti Nissan Frontier Patrol Car a minaneho ni Police Chief Inspector Sosimo Racho, kameng ti Ilocos Sur Provincial Police Office (PAIDSOTG), ken kakaduana a polis a pakairamanan ni OIC PSI Roy Tapado Rafanan ket idi makadanon ti lugan iti Barangay Bungro, kellaat a nagparang dagiti suspek iti akindaya a paset ti highway ket binansagda ti patrol car a nakadadaelan ti windshield daytoy.

Kinamat da Racho dagiti suspek agingga iti naipiskotda.

Naipan dagitoy iti Magsingal District Hospital para iti medical examination sada napalutpot iti municipal police station.#