Pautang iti I. Sur Hog Raisers Association, maipabulod a burias

VIGAN CITY – Segun iti maysa nga opisial ti asosasion dagiti hog raisers, aramatenda ti pautang nga inted ni Gov. Luis “Chavit” Singson nga igatang iti burias a taraknen dagiti miembroda.

“Agyamankami ta inikkan ni Apo Gobernador ti Ilocos Sur Hog Raisers Association iti P1.5 milion,” kinuna ni Tejada sana inyunay-unay a saan a doleout no di ket pautang ti inted ti gobernador.

Agpada nga inikkan ni Singson iti sag-P1.5 milion ti asosasion dagiti hog raisers ken hog traders kas tulongna tapno mapapigsa ti industria iti probinsia.

Kinuna ni dati a bise mayor Edgar Tejada ti Santa, Ilocos Sur ken bise presidente ti gunglo a napag-aanamongan dagiti opisial ti gungloda nga ipabulodda met ti inted ti gobernador a kas burias kadagiti miembroda nangruna dagiti backyard hog raisers wenno dagiti nagsardeng gapu ta nalugida idi karigatna ti agtaraken iti baboy tapno adda pangrugian ken tapno makasubli ken makaungar dagiti babassit nga agtartaraken iti baboy.

Nupay kasta, segun ken ni Tejada, adda dagiti requirements nga aramiden dagiti miembro nga interesado nga agtaraken manen iti baboy.

Nagyaman met ni Tejada ken ni Juliet Seguban, proprietress iti Seguban Enterprises ken tesorera iti gunglo, gapu iti panangipabulodna kadagiti teknisianda a mang-inspek kadagiti resipiente tapno masiguro a magun-odda dagiti requirements kas iti paggianan, suplay ti danum ken waste disposal sakbay a maikkanda iti burias a taraknenda.

Kinuna ni Tejada a napag-aanamongan iti asemblia ken iti board nga aggapu met laeng kadakuada a miembro dagiti maiwaras a maipabulod a burias kadagiti resipiente.

Kinuna ni Tejada a maipabulod pay kadagiti resipiente dagiti feeds babaen ti Seguban Enterprises ken mailako dagiti baboy iti Ilocos Sur Hog Raisers Association ken iti nasao a pagtagilakuan tapno adda madadaan a marketda.

Kinunana a diay bayad ti burias ken ti feeds, maisubli iti asosasion ken iti Seguban Enterprises ket ti ganansia, mapan iti agtaraken.

Nupay kasta, kinuna ti bise presidente ti hog raisers association a saan pay a maikkan amin dagiti miembro agsipud ta saan a makaanay ti impautang ti gobernador.

Kinunana a nangaramidda iti resolusion a naiturong kadagiti dua a congressman ti probinsia tapno nayonanda ti impautang ni Gov. Singson tapno dakdakkel ti puonanda ken ad-adu ti mabenepisiaranda nga agtartaraken iti baboy.

Kabayatanna, kinuna ni Singson a sag-P1.5 million ti intedna kadagiti dua nga asosasion tapno balance ti panangtulongna kadagitoy tapno saan a matay ti industria.

Kinunana a no matay ti industria, ti met laeng publiko ti mapuntaan agsipud ta ditoyton probinsia ti pakaibuntokan kadagiti reject a baboy.

Itay nabiit, kas sampol kadagiti agipuspuslit iti baboy ditoy probinsia, saan a multa ti naiwayat no di ket pinaparti ti gobernador dagiti pito a baboy a maipuslit koma iti San Vicente sana pinaiwaras kadagiti charity institutions kas iti Balay Taripato ken iti provincial jail.#