Pawnshop, sinerrek ti Tunnel Gang; P4.5-M kinurimesda

VIGAN CITY – Sinerrek dagiti mannanakaw ti maysa a pagsaldaan a masarakan iti sentro ti Vigan ket kinurimesda dagiti alahas ken kuarta iti vault a mapattapatta nga agdagup amin iti P4.5 milion.

Mapattapatta a naisayangkat ti nasao a panagtakaw iti Tambunting Pawnshop a masarakan iti Quezon Avenue, Barangay I, ditoy siudad idi rabii ti Nobiembre 1 a nakatuon ti imatang dagiti polis iti pannakatagiben ti urnos ken talna iti panagdudupudop dagiti tattao iti sementario tapno selebraranda ti Piesta dagiti Natay.

Naduktalan laengen ti panagtakaw iti nasao a pawnshop idi naglukat ni Vilma Gascon, manager, iti alas dies ti bigat ti Nobiembre 2.

Segun ken ni Gascon, nakigtot laengen idi linuktanna ti pawnshop ta naipasabat kenkuana ti dakkel nga abut iti suelo a nagnaan dagiti mannanakaw iti iseserrekda iti pawnshop.

Mapattapatta nga aganay P1 milion dagiti auction nga alahas ken aganay a P2.6 milion dagiti alahas, kasta met ti di pay ammo ti dagupna a kuarta nga adda iti uneg ti vault.

Iti inisial a panagimbestiga dagiti polis, mapapati a simrek dagiti mannanakaw iti uneg ti pawnshop babaen ti panangabutda iti nauneg a kanal iti sanguanan ti pawnshop.

Idi addan dagiti mannanakaw iti uneg, pinorsarda a linuktan ti vault babaen ti panangdadaelda dagiti kandado babaen ti steel saw.

Mapapati a naglibas dagiti mannanakaw babaen met laeng ti simrekanda nga abut ken iti kanal.

Nakanalan ti bangketa ti Quezon Avenue agsipud ta lalayusen iti daytoy a lugar tapno nadaras ti panagares-es ti danum no panagtutudo.

Kinuna ni Gascon a nasapada a nangrikep maysa nga aldaw sakbay ti panagtakaw gapu ta Piesta ti Natay.

Innayonna nga awan ti napaliiwda a suspetsoso malaksid ti kaadda dagiti lallaki a ganggannaet ti rupada a nagistambay iti sanguanan ti pawnshop kadagiti napalabas nga aldaw.

Nupay kasta, impatalged ti manager a mapasubli met laeng dagiti agtagikua dagiti alahas a naisalda iti pawnshop. Ngem saan a maibaga ni Gascon no kasano ken kaano a maisubli dagiti natakaw nga alahas.

Ngem sumagmamano a nagsalda iti alahasda ti nangbabalaw iti pawnshop agsipud ta awan man laeng ti guardia daytoy ken awan ti alarm system ken kamera idinto a requirement dagitoy kadagiti business establishments iti siudad.

Kinuna ni Gascon nga adda met guardiada iti napalabas ngem awanen ti naisukat pay idi na-retrench daytoy.

Kasta met nga inkalintegan ni Gascon a sakbay ti panagtakaw, adda metten pakaammo ti main officeda a sumarunoda a maipasdekan iti CCTV.

Iti pannakaisurat daytoy, awan pay ti natiliw a suspek iti panagtakaw.#