Payapay iti Sirok ti Asul a Bulan

Sarita ni Ma. Theresa B. Santos

(Maikapat a paset)

 

Napanunot ni Patricia ti dumagas iti BGHMC. Uray ta nasapa pay met. Sarakenna ni Bernard. Nakadiuti la ketdi daytoy. Pinartakannan ti nagna. Sinita ti guardia idi sumrek koman iti ospital, ngem inrasonna a saan a bumisita iti pasiente no di ket agturong iti PT Recovery Section tapno agpakunsulta. Pinastrek met ti guardia. Saan ngamin a mapalubosan dagiti bumisita iti pasiente a saan pay nga oras ti panagbisita – manipud iti alas-onse iti bigat agingga iti alas tres iti malem.

Saanen nga agdadamo iti PT Recovery Section, nakapaminpaten a pimmasiar ditoy. Am-ammo pay ketdin dagiti kaeskuelaan ni Bernard a padana met nga interna. Simrek. Ngem naklaat iti impasungad ni Nathalie kenkuana, maysa kadagiti PT intern a kaeskuelaan ni Bernard ken nakatoka nga agbantay iti information table.

“Good morning, ma’am! Ni Bernard?” kinuna ti panayagen ken estudiante iti University of Baguio.

Saan a nakatimek ni Patricia. Dina ammo ti isungbatna—basta lattan naikuleng ken nagbalin a kawaw ti mugingna—saanna a maawatan—iti biag adda dagiti saan a maawatan a banag ta kaiyarigan dayta ti nakarikep a ridaw a sa la maammuan ti linaonna no malukatan.

“Ala, Ma’am, dua nga aldawen nga absent. Damdamagen ni Ma’am Mitch, ngem saan met a makontak iti selponna. Nagawid idi malem ti Sabado.”

Saan a nakatimek ni Patricia. Matmatmatanna lattan ti interna a physical therapist.

“Saanna nga imbaga kenka ti panagawidna, Ma’am?”

“Saan met. Isu ngarud a sarungkarak koma ta adda ibagak. Wen, kasta nga agpayso. Saan a makontak iti selponna.”

“Ania met daydiay a tao. Ania ti mapaspasamak kenkuana?”

Saan a nakasungbat ni Patricia. Inbaliwna laengen ti saritaan, madamdama pay nagpakadan.

Kasla kawaw ti panunot ni Patricia kabayatan ti panangpanurnor ti naglugananna a taxi ti makinbaba a paset ti Harrizon Road. Nagsardeng dagiti lugan iti agsumbangir a kalsada—agpangato ken agpababa ta trapik iti Mabini intersection—kumamang dagiti lugan nga aggapu itoy agpangato a Harrizon. Iti panangipalabas ni Patricia dagiti matana kadagiti taxi nga agtartaray, naisulek dagiti matana ni Bernard nga umis-isem ken agpaypayapay kenkuana!

Napamisuot. Adda met la gayam iti Baguio ngem dina ibagbaga? Nakarikna iti pannakasemsem. Dina man la ipakaammo no ania ti saanna a nagustuan.

Nagmalanga ni Patricia. Umis-isem met ni Bernard nga agpaypayapay. Uray pay, apay a saan nga agteks wenno umawag koma? Apay a saan nga agpasiar ni Bernard sadiay balayda?

Ngem sangaagpa ti kadakkel ti barikawwet iti lulonan ti balasang.

Nagandar ti taxi a nangitulod kenkuana iti Lower General Luna.

Iti kabigatanna, kinasao ti Area Manager a mapan kabigatanna iti kabarbaro a lukat a branch sadiay San Fernando tapno isu ti mangiwanwan iti trabaho ken urnos dagiti empleado. Saan a nagpangadua pay ni Patricia. Iti marikriknana a pannakasemsem ken ni Bernard, nasaysayaat no makumikom iti trabaho tapno maiyaw-awanna dayta a banag.  Tallo nga aldaw nga nagsublisubli—bumaba a masapa, sa met la sumang-at iti Baguio iti malem. Adda met ketdi service a luganda—maysa nga SUV ken addaan iti panglakayen a drayber.

Naginana iti aldaw ti Domingo. Nasuroken a makalawas a dina makontak ni Bernard.

Aldaw ti Lunes, agreport manen iti Baguio Branch. Agaladies idi nagsardeng ti naglugananna a dyip iti paradaan daytoy iti abay ti maysa kadagiti agdan ti U-shape overpass. Umul-ulin iti agdan idi masaripatpatanna ni Bernard a nakatakder iti ruangan ti Tiongsan Department Store. Tumaltaliaw met kenkuana ken agpaypayapay daytoy. Ngem saanen a kas iti sigud a naragsak ti baro—a taal a kostumbre daytoy. Ita, naliday unay ti langana, kasla imbaklayna ti lubong!

Saan nga ammo ni Patricia iti aramidenna: no sungbatanna ti payapay ni Bernard wenno saan. Sinallukoban ti kinangato ti timidna—ti pannakasemsemna. Adda gayam ditoy Baguio, apay a saan nga agteks wenno umawag koma wenno agpasiar idiay balayda wenno iti trabahona?

Inkeddeng ni Patricia a saanna a sungbatan ti payapay ti kaayan-ayatna. Indumogna ti nagna. Nasken nga ipariknana met ti kinaadda iti pannakasemsemna. Ipariknana met a mabusor.

(Maigibusto)