PBA legends, sinangaili ti Barangay 3, Vigan City

VIGAN CITY – Kangrunaan a sangaili iti pannakainagurar ti baro a pagbasketbolan iti Barangay 3 ditoy siudad itay Mayo 25 dagiti dagiti retirado a basketbolista iti pagilian.

Kasla pagpiestaan ti Barangay 3 ditoy gapu iti kaburnok dagiti tattao a timmabuno iti inagurasion ti basketball court gapu iti kaadda da Alvin Patrimonio, Ronnie Magsanoc, Benjie Paras, Jerry Codiñera ken Johnny Abarrientos, nalatak a basketbolista iti Philippine Basketball Association (PBA) idi kabambannuaganda .

Naipatakder ti basketball court babaen ti GeiserMaclang, agparpartuat iti Alaxan FR.

Naawagan iti Court of Inspiration, naipatakder ti nasao a proyekto babaen ti panagtitinnulong dagiti bumarangay ken ti nasao a kumpania tapno maitag-ay ti biag dagiti agtutubo ken bumarangay.

Nakiay-ayam pay dagiti basketball legends kadagiti lokal a basketbolista.#