Footer

PCA, mangted iti cash insentive kadagiti agmula iti niog

LA UNION – Kas paset ti programana a mangidur-as iti industria ti niog iti pagilian, impakaammo ti Philippine Coconut Authority, Regional  Office, a mangted ti ahensia iti cash incentive a P30 tunggal maimula a niog.

Kinuna ni PCA Regional Director Dennis Calub a nagkatlo a paset ti panagbayad ti ahensia: umuna, mabayadan iti P7 ti kada niog a maiplastar tapno maipatubo apaman a mabisita dagiti pannakabagi ti PCA; kalpasan ti sumagmamano a bulan, sublianda a bisitaen ti lugar ket agbayadda manen iti sabali pay a P7 ti kada nagtubo; ken maikatlo, kalpasan ti sumagmamano pay a bulan, bayadanda iti P16 ti tunggal aktual a naimula a niog kas pangkompleto iti P30 nga insentibo iti panagmula iti niog.

Kinuna ni Calub nga iti  agdama, napamulaandan  iti niog ti nasurok tallo gasut nga ektaria a daga iti Rehion I  a pakairamanan ti 235 ektaria iti Ilocos Norte, 30 ektaria iti Ilocos Sur, 27.5 ektaria iti La Union ken 25 ektaria iti Pangasinan.

Innayonna nga adda tallo nga ektaria a lote nga indonar ti local government unit ti San Ildefonso, Ilocos Sur a pinagbalin ti PCA kas demo farm ti niog a mabalin a pagalaan iti coconut seedlings.

Kinuna pay ni Calub nga adda met programada a “Dagdag Bunga, Ang Niyugan Araruhin” wenno ti panagmula iti sabali pay a mula iti nagbabaetan dagiti agbungbungan a niog.

“Mabalin nga ipatengnga ti mais kas added crops. Babaen itoy a wagas, maaddaan ni mannalon iti kanayonan a kita,” kinuna ni Calub.

Kinuna ti regional director nga irekrekomenda pay ti PCA ti panagusar dagiti agmulmula iti asin kas abono dagiti niog.

Segun ken ni Calub, malaksid a tumibker dagiti pinuon, napaneknekan ti ahensiana nga immadu iti 25% ti naibunga ti tunggal pinuon ti niog  a naimula iti Ilocos Norte ken La Union nga adayo iti aplaya a ginanagananda iti dua a kilo ti asin.

Mas epektibo ti pannakaipakat ti biological control para iti pannakapaksiat ti peste ti niog kas iti Brontispa ken rhinoceros beetle no idilig iti trunk injection nga Actara nga addaan iti side effect iti mula, segun ken ni Calub.#