PCOS machines, nainget ti pannakabantayda iti Cabugao

CABUGAO, Ilocos Sur – Nainget ti pannakabantay dagiti PCOS machines a naiwaras kadagiti pagadalan ditoy a maaramat iti panagpipili inton Mayo 13 daytoy a tawen.

Naammuan ti Tawid News a naiwaras dagiti PCOS machines kadagiti 26 a pagadalan ditoy a naituding a polling precincts idi Mayo 4.

Segun ken ni Police Inspector William Nerona, adda naituding a polis nga agbantay kadagiti pagadalan a nakaiwarasan dagiti PCOS machines agingga iti panagbubutos.

Adda pay naibaon a 18 a kameng ti Philippine Army ken 4 a nainayon a polis tapno tumulongda para iti pannakatagiben ti urnos ken talna iti panagbubutos ditoy nga ili.

Pinal a tinesting dagiti kameng ti Board of Election Inspectors dagiti PCOS machines idi Mayo 6 no nasayud met la ti operasionda para iti panagbubutos.

Mismo a da Police Chief Superintendent Ricardo C. Marquez, regional director ti Police Regional Office 1, Police Senior Superintendent Sterling Blanco, regional intelligence director, Police Senior Superintendent Dennis L. Basngi, acting provincial director iti Ilocos Sur Police Provincial Office, ti nangputipot iti masking tape iti murdong dagiti paltog ken pannakapirmada sakbay ti pannakaidulinda for safekeeping iti police station.

“Responsibilidad ti maysa a gun owner ti pannakaammo a ti panagiggem iti paltog ket maysa met laeng a pribiliheo, saan ketdi a maysa laeng nga ordinario a banag, isu nga impakitami… a responsiblekami met nga agtuturay,” kinuna ni incumbent Mayor Edgardo S. Cobangbang, Jr.

Innayon ni Cobangbang a a sisusuporta iti daytoy a gannuat ti kapolisan ti Cabugao nangnangruna ita a terminona nga agserserbi agsipud ta padapadada amin a mangtuntonton ti pannakapaadda ken pannakamentener iti nalinak ken natalna nga eleksion iti ilida.

Kabayatanna, nupay diniskualipa ti Comelec ti sertipiko ti kandidatura ni Amelia Amparo Sunio-Abarquez a kasangona, agtultuloy nga inggaed da Cobangbang ken ti grupona a pakaibilangan ti katiketna a ni Deogracias Jose Victorino, anak ni incumbent Vice Governor Deogracias  Victor Savellano, a tumaray a para bise mayor, ti nagkampania kadagiti nadumaduma a barangay ditoy nga ili.

Kanaig daytoy, linagidaw ni Cobangbang ti wagas ti pammadpadakes ti kampo ti kasupangetna iti politika nga inranada pay met idi panagpiesta daytoy nga ili.

Kinuna ni Cobangbang a masurot koma ti proseso ti linteg, saan ketdi a pammadpadakes idinto nga innayonna a mamati a kolor politika ti adda iti likudan daytoy nga smear campaign maikontra kenkuana.

Bayat ti parada iti panagpiesta ti Cabugao, mapapati a naiwaras kadagiti tattao dagiti polieto a nakaipalaonan ti kaso a murder a naipila maikontra ken ni Cobangbang.

“Agtutorda koma met ta adda korte a mangrisut iti daytoy,” kinuna ni Cobangbang kas reaksionna idinto nga innayonna nga ad-adda a “bimmaba ti level” ti panagkitkita ti mayoria iti “kastoy klase a tattao”  gapu iti daytoy inaramidda nga smear campaign maikontra kenkuana.

Kinuna pay ni Cobangbang a nupay diniskualipika ti Comelec ti kasupadina, saanna a pawilan ti panagkampania daytoy.

“No kayatna, uray agkukuyogkami pay nga agkampania,” kinunana idinto nga indagadagna ti panagtitimpuyog ken panagmaymaysa tapno masolbar dagiti makitana a problema iti ili a Cabugao.#