PCSO, kasano a naigamer iti utang?

BY EDITORIAL STAFF

Iti maysa a report manipud iti Commission on Audit, nagpukaw gayamen ti PCSO iti P89 milion idi 2003 ket idi 2005, immabuten ti depisitna iti aganay P1 bilion.

Iti isasango ni Margie Juico, agdama a chairman ti PCSO, iti committee on appropriations ti Kamara, impalgakna nga immabuten iti P4-billion ti utang ti PCSO a pinanawan ti napalabas nga administrasion.

Lumlumtuad itan a saan gayam a nasayaat ti pannakagasto ti kuarta ti PCSO a sigurado a nakaapektaran ti serbisio ti salun-at ken kaasi nga agpaay koma kadagiti umili nangnangruna dagiti marigrigat. Ngem ti narigat nga awaten ti panangabuso dagiti turayen daytoy nga ahensia kadagiti pondona.

Madakamat ditoy dagiti adu unay nga anunsio ken promosionna a maipabuya  kadagiti TV shows, radio programs ken pagiwarnak a nagbusbosan iti minilion a gatad. Ngem ti makadakes, ti alegasion a dakkel ti gatad a naglasat iti sirok ti lamisaan a nagleksaban iti dakkel dagiti advertising agencies a mapapati nga impasdek met laeng dagiti media personalities a kameng iti napalabas a board.

Sabali laeng ti panangbusbos ti PCSO iti pondona ti kaasi para iti documentary stamp tax para iti operasion ti lotto a mapapati nga aggatad iti P1.686 bilion idi 2008.

Segun pay iti COA, sumagmamano pay nga agilinlinteg ti immawat iti tseke manipud iti PCSO, a mangibagi iti bingayda iti STL Charity Fund. Nasurok met a P7 a milion daytoy.

Ginasut pay a milion a binusbos ti PCSO para iti intelligence nga alegasion dagiti kritiko a nagkaudan laeng ti napalabas a liderato para iti kampania iti eleksion idi 2010.

Kas mandatona, rumbeng koma nga ilatang ti PCSO ti 55 porsiento ti netona iti mapastrek iti nalakona a tiket kadagiti mangabak, 30 porsiento para iti pundo ti charity ken 15 porsiento para iti operating expenses.

Ngem lumlumtuad itan a sobra nga adayo ti binusbosna ti PCSO para iti operasionna ngem iti nailatang a pondo para iti daytoy ket kimmaud iti pondo ti charity a rumbeng koma a maipaay iti serbisio ti salun-at ken kadagiti prioridad nga ahensia ti gobierno a pangtedanna kadagiti kontribusionna a kas iti Commission on Higher Education ken ti Dangerous Drugs Board.

Mano koma nga umili ti naisalakan ken patay kadagiti problemada iti salun-at, nabenepisiaran iti edukasion, ken naikkan iti gundaway nga bumangon manipud iti pannakaigamerda iti droga?

Rumbeng a kutkoten a nalaing dagiti agilinlinteg daytoy a pannakaabuso ti pondo ti PCSO ket maisaklang dagiti nagabuso a turayen tapno adda pagmennamennaan dagiti sumarsaruno nga agtakem itoy nga ahensia.#