PCSO, nanglukat iti Ilocos Sur

CANDON CITY. Saanen a makilinia iti atiddog dagiti tattao a kayatna agpatulong iti Philippine Charity Sweepstakes Office wenno PCSO iti La Union wenno Ilocos Norte ta addan a pormal a nanglukaten ti PCSO-Ilocos Sur ken nabendisionan itay nabiit.

Masarakan iti Candon City Hall, ti PCSO ti mangserbi kadagiti amin nga agpatulong nga agnanaed iti probinsia ti Ilocos Sur ken Abra.

Imbagian ni PCSO Vice President ken General Manager Jose Ferdinand Rojas ni PCSO Chairman Erineo “Ayong” Maliksi iti pannakaselebrar ti nasao a proyekto. Adda pay da Congressman Eric Singson, Vice Governor Deogracias Savellano, Provincial Board Member Jaime Singson, Mayor Ericson Singson ken dagiti sumagmamano a Mayor iti ili iti probinsia.

Kagiddan ti inagurasion ti panakaited ti dua nga ambulansia iti ili ti Salcedo ken Quirino nga inawat da Leopoldo Gironella, Jr. ken Clifford Patil-ao.

Pinagyamanan ni Congressman Singson ti  pormal a panaglukat ti PCSO-Ilocos Sur ta adu ti matulongan a kailianna.

“Malapit na kami sa PCSO,” kinuna ni Singson.

Naammuan kenni Mary Jane Claridad, OIC iti PCSO Ilocos Sur, a pakairamanan kadagiti serbisio nga ipaayda ket ti panangtulong kadagiti umili nga agkasapulan iti tulong, agawat iti aplikasion ti lotto outlet, mangipaay ti premio iti nababbaba iti P500,000 ken dadduma pay.

Kinuna ni Congressman Eric Singson nga adda lote a masarakan iti abay ti Candon City Hall a pakaipatakderan ti dakdakkel ken nalawlawa a pasdek ti PCSO.

“Dakkel a banag ti kaadda ti PCSO ditoy probinsia ta adu ti matulonganda ken asidegen ti pagturongan dagiti agtaya,” kinuna ni Singson.#