Footer

PDEA asset, napapatay; kaduana nakipinnaltog iti suspek

STA. MARIA, Ilocos Sur – Napapatay ti maysa nga asset ti Philippine Drug Enforcement Agency (PDEA) idinto a nasugatan ti kaduana iti pannakipinnaltogna iti suspetsa.

Dead on the spot ni Roland Corrales, 33, baro, PDEA asset, residente iti Nalvo ditoy nga ili gapu iti grabe a sugatna iti tengnged.

Nasugatan met ti kadua ni Corrales a ni John-John Domingo, 26, naasawaan, residente iti Poblacion ditoy bayat ti pannakipinnaltogna iti suspetsa a nabigbig a ni Manuel Jimenez, 55, naasawaan, residente iti Poblacion Norte.

Naitaray ni Domingo iti Reyes Clinic and Hospital gapu iti sugatna iti makannigid a sakana ken kanawan nga imana.

Nasugatan iti tian ken kanawan nga ima ni Jimenez ket immuna a naipan iti Reyes Clinic and Hospital sa naiyalis iti Candon City General Hospital.

Iti pannakiuman ni Jun Ramos  bayat ti programana a Barangay Commando-Brigada ken ni hepe ti polis Eric Fernandez, nadakamat daytoy a “daan a susik” ti posible a kagagapu ti pammaltog.

Segun iti report manipud iti polis, madama nga agiinom da Corrales ken Domingo iti uneg ti balay ti naud-udi iti agarup alas siete ti rabii ti Sept. 6 idi simrek ti suspetsa ket nagpatangda iti biktima a nagtungpal iti   panagbinnarada.

Mapapati nga inasut ti suspetsa ti paltogna sana pinaputokan iti namindua ni Corrales a nakatayan a sigida ti biktima.

Mapapati nga inuyos ni Domingo ti nakasabbikel a paltog ni Corrales ket nakipinnutok ken ni Jimenez nga aglibas koman a puon ti nakasugatanda a dua.

Nakarekobre dagiti polis iti lima a bala, maysa a kapsula  para iti 9-MM, maysa a magasin, maysa a holster ken dua a kapsula para iti cal. 45.

Kinuna ni Fernandez nga adda nakabantay a polis iti ospital a nakaitarayan ni Jimenez.

Kinunana a yantangay, nabigbigen ti nangisayangkat iti pammaltog, maipilan ti kaso maikontra iti suspetsa.#