Footer

PDEA-RO1, mangiwayat random testing kadagiti drayber, konduktor agbibiahe iti Region I

SAN FERNANDO CITY – Mangisayangkat ti PDEA-Region 1 iti random testing kadagiti drayber ken konduktor  nga agbibiahe iti Region I tapno malapdan ti panagaramatda iti droga ken masalakniban dagiti aglugan ken ti komunidad.

Daytoy ti impakaammo ni PDEA regional director Roberto Opeña bayat ti dua nga aldaw a seminar iti Competency Enhancement on RA 9165 a naangay iti Masigasig Center ti police regional office itay nabiit a nakipartisiparan ti 75 a polis a pakairamanan dagiti staff officers ti PRO1, personnel ti PDEA-RO1, opisial dagiti provincial ken regional anti-illegal drugs special operations task groups ken hepe ti La Union ken city police stations.

Kinuna ni Opeña nga isayangkat ti PDEA nga idauluanna ti random testing kalpasan a nakaawat kadagiti report a sumagmamano a drayber ken konduktor dagiti bus nga agbibiahe iti las-ud ti Region I ken kaparangetna a rehion ket mapapati nga agar-aramatda iti droga tapno saanda nga agdungsa bayat ti panagbiaheda.

Innayon ni Opeña a napatalgedan daytoy nga alegasion kalpasan ti aksidente a napasamak iti Barangay Banangan, Sablan, Benguet idi Agosto 18 a nakainbolbaran ti maysa a bus a nagresulta iti pannakatay ti pinullo a tattao.

Natinnag ti Eso-Nice a bus a naggapu iti Baguio City iti derraas iti nadakamat a barangay kalpasan a mapapati a napukaw ni Romeo Suban, Jr, drayber  ti bus, ti kontrolna iti manibela a nagtungpal iti pannakatay ti 42 a tattao.

Nakalasat ni Suban ket maag-agasan iti intensive care unit ti Baguio General Hospital. Nakalasat met ni John Patrick Flores a timmapuak iti bus sakbay a natinnag daytoy iti derraas.

Kinuna ni Opeña a masuspetsa ni Suban nga adda iti inpluensia ti droga idi mapasamak ti aksidente.

Kinunana a mapakatan ni Suba iti drug testing tapno maammuan ti kinapudno ti report.

Impakaammo pay PDEA regional director nga idi Enero 26, inaresto ti nagtipon nga elemento ti PDEA-RO1 ken La Union police iti naisayangkat a buy-bust operation ni Alfredo Rivero a.k.a. Joho a karaman iti watchlist ti ahensia nga idauluanna.

Maysa a bus dispatcher ni Rivera iti ESO-NICE ket mapapati nga isu ti supplier ti droga dagiti sumagmamano a drayber ken konduktor ti nasao a kompania.#