Peb. 15, deadline panagala permit dagiti koboy

SAN JUAN, Ilocos Sur  – Inton Pebrero 15 ti deadline a naituding a panagala dagiti aggatgatang iti tabako a koboy iti permit, daytoy ti impalagip ti National Tobacco Administration itay nabiit.

Imballaag ti NTA a dagiti koboy a masukalan nga awanan permit kalpasan ti nasao a deadline ket mapakatan iti multa.

Sabali laeng ti mayor’s permit nga alaen dagiti aggatang iti tabako tapno makagatangda iti daytoy produkto dagiti mannalon kadagiti barangay.

Kinuna ti maysa nga opisial a naipakat daytoy tapno manamnama a mailista dagiti tabako a magatang iti maysa nga ili ket saan a maipanaw ken mailista iti sabali nga ili.

Dakdakkel ti bingay ti ili iti excise tax ti tabako no dakdakkel ti produksionna.

Iti agdama a bingay manipud iti RA 7171, 40% mapan iti munisipalidad, 30% iti distrito, ken 30% iti probinsia.#