BANTAY, Ilocos Sur – Nagsuspetsada nga adda mangsipsiput kadakuada ket tinarayanda ti bag a naglaon iti peke a kuarta, wenno nalipatanda iti nangidissuanda?

Suspetsa ti polis ditoy a nalipatan dagiti lallaki ti bag iti panagdardarasda a pumanaw kalpasan ti pannanganda iti maysa a karinderia iti maysa a barangay ditoy ngem nagbutengdan nga agsubli pay a mangtunton iti nasao a bag.

Ngem kada Gina Rochina, akinkukua iti Rochina’s Eatery a masarakan iti barangay Cabalanggan ditoy nga ili, nakigtotda iti pannakasukainda a pinullo a ribu ti pateg dagiti kuarta a linaon ti bag.

Segun ken ni Rochina, agarup alas dos ti malem ti Agosto 12 idi sumagmamano a lallaki ti simrek iti karinderia tapno manganda.

Ganggannaet iti panagkitana ti rupa dagiti simrek a kustomer.

Kalpasan ti pannangan dagitoy, nagluganda iti dyip a pampasahero ket nagpadayada a direksion.

Naduktalan da Rochina a nabati dagiti kustomer ti maysa a back pack a naiparabaw iti bakante a tugaw iti lamisaan a nangananda.

Linuktanda ti bag ket nakigtotda laengen idi makitada a naglaon daytoy kadagiti kuarta a nabingay iti 28 a sag-P1,000; 81 a sag-P500; ken 89 a sag-P200 nga agdagup iti P86,300.

Gapu ta adda suspetsada a peke dagiti kuarta, nagturongda iti PCI Equitable Bank sada pinaamiris ket napatalgedan a peke dagitoy.

Inreport da Rochina ti insidente iti polis ket nangiwayat dagitoy iti palab-og tapno matiliw dagiti suspetsa no agsublida a mang-claim iti bag ngem saanen a nagparang dagitoy.

Sakbayna, naipadamag ti pannakatiliw iti ka-Manilaan dagiti sumagmamano a tattao a mapapati a kameng

ti sindikato nga agiwarwaras iti peke a kuarta a maipagarup a napartuat iti Bulacan.#