VIGAN CITY – Nagballaag dagiti polis ken opisial ti bangko iti kaadda dagiti maiwarwaras peke a kuarta iti sumagmamano a probinsia iti Rehion I ken iti Baguio City.

Segun ken ni P/Sr. Supt. Marvin Balabala, hepe ti Central Intelligence and Detection Group iti rehion a nadiskobre ti kaadda dagiti peke a P500 bills iti maysa a galieraan iti Pangasinan ken kabayatan ti pannakarambak ti Panagbenga iti Baguio City.

Kinumpirma met dagiti opisial ti bangko nga adda dagiti peke a P500 bills a nagraira iti Baguio City ken iti rehion idinto nga impatigmaanda a miraen a nalaing dagiti umili dagiti P500 nga ibayad wenno ipasupli dagiti aggatang amangan no peke dagitoy.

Maysa a pagilasinan ti peke a P500 ti balikas a naisurat iti babaen ti wagayway ti pagilian iti kanawan ti ladawan ni nag-Senador Benigno Aquino, Jr.

Iti husto a kuarta, naisurat ti “Faith in our people and faith in God.” ngem iti peke a P500, immuna ti “God” ket naudi ti “people”.

Segun dagiti autoridad ti bangko, nalamlamuyot nga amang ti papel ti husto a P500 ken saan a nalawag ti watermark ti peke a kuarta no maipasir iti lawag.

Naammuan a naduktalan ti kaadda dagiti peke a P500 bills iti La Union idi pay la Nobiembre ken Disiembre.

Mapapati a kaadduanna kadagiti peke a kuarta ti naggapu iti Baguio City.

Maysa a residente a dina kayat ti painaganan ti nagkuna a posible a maaramat dagiti peke a kuarta a pangliwliw kadagiti botante.

Mapapati a sumagmamano a pagtagilakuan iti siudad ditoy ti nabiktima iti peke a kuarta bayat ti Maika-2 a Philippine Olympic Festival.#