SAN JUAN, Ilocos Sur – Maysa a peke a kameng ti media ti naireport a nagkikil iti maysa a babai a negosiante ditoy nga ili kas kasukat iti panangsertipikarna a nadalus ti bakery shop daytoy.
Nagpulong ti maysa a Imee Miranda, 34, iti polis ditoy a kinikilan ti maysa a lalaki a nagpammarang a kameng ti media iti P6,000.00 kas sukat iti panangsertipikarna a nadalus ti bakery shop daytoy.
Sakbayna, simrek ti nabigbig a peke a mediaman iti 1234 Bakeshop a kukua ni Miranda a masarakan iti Immayos Norte ditoy nga ili ket imbagana a mangiwayat iti inspeksion iti bakery shop daytoy gapu ta nakaawat kano iti pulong a narugit daytoy.
Kalpasan ti inspeksion, kinuna ti peke a mediaman a sertipikaranna a nadalus ti bake shop ni Miranda no mangted daytoy iti P6,000.00.
Kinuna ni Miranda nga intedna ti dinawat ti peke a mediaman nga awan a pulos ti panangipagarupna a manglimlimo laeng daytoy.
Segun ken ni Miranda, naglugan ti peke a mediaman iti traysikel a nagmarka iti Sta. Catalina idi napan iti bakeshopna.
Maysa pay a pakailasinan ti peke a mediaman ti kinapukol ti sakana.
Kanaig daytoy, nagballaag ti kapolisan ditoy kadagiti dadduma pay nga akinkukua iti pagtagilakuan ditoy nga ili iti panangireportda no adda dagiti tattao nga agpampammarang a kameng ti media nga agdawdawat iti kuarta.
Iti kallabes, adda dagiti nai-report a kameng ti media a nagdawdawat iti kuarta kadagiti prominente a tattao kas sukat kadagiti write-up nga ipablaakda iti pagiwarnak wenno iti inter-bioda a maipatangatang iti radio.
Mapapati a nagbalin pay a biktima dagitoy dagiti barangay ken town officials ken uray pay provincial officials.
Sabali pay ti naireport a panagsolisit ti sumagmamano a kameng ti broadcast/print media para iti pagiwarnak a pagsursuratanda wenno iti part-time a programada iti lokal a radio wenno cable television.
Kinuna ni Miranda nga impulongna ti napasamak a panagkikil kenkuana ti peke a mediaman tapno maballaagan dagiti padana a negosiante ket saanda a mabiktima daytoy a mapapati nga agdakdakiwas iti umuna a distrito ti probinsia.#