Peke a mediaman, nakemmeg sadiay Pangasinan

BINALONAN, Pangasinan – Nagpullo ti maysa a peke a mediaman kalpasan a nakemmeg dagiti polis sadiay Binalonan, Pangasinan idi rabii ti Pebrero 17.

Iti pannakaisurat daytoy, nakakustodia iti police station ti Sta. Cruz, Ilocos Sur ti peke a mediaman a nangibaga iti naganna a maysa a Dexter Razon alias Nelson Tulfo.

Babaen ti koordinasion dagiti polis ditoy nga ili, balligi nga insayangkat dagiti polis ti Sta. Cruz iti panangidaulo ni Police Chief Inspector, Simon Damolkis, COP, ti pursuit operation maikontra iti nasao a peke a mediaman a nagtungpal iti pannakakemmegna iti nadakamat nga ili.

Sakbayna, nagreklamo iti polis ti agassawa a Carlito ken Marilyn Samson,  a naudi a biktima ti peke a mediaman.

Mapapati a dimmawat ti suspek, maysa a pukol, ken naka-wheel chair,  iti P3,200.00 kadagiti biktima kasukat ti saanna a panangipatangatang iti radio ti mapapati a kinarugit ti bakery shop dagiti agassawa a masarakan iti Barangay Capariaan ti nasao nga ili.

Naammuan dagiti polis a bimmaba ti suspek iti traysikel a naglugananna sadiay Bimmanga, Tagudin sa naglugan iti Viron bus.

Apaman a naawat dagiti polis-Binalonan ti flash alarm, sinaedda ti bus sada pinababa ti suspek ken impan iti police station no sadino a nangpidutan kenkuana dagiti polis ti Sta. Cruz.

Mapapati a daytoy met laeng a tao ti nangbiktima iti akinkukua iti maysa a bakeshop met laeng iti San Juan, Ilocos Sur idi umuna a lawas daytoy a bulan.

Segun ken ni Mrs. Miranda, akinkukua iti 1234 Bakeshop a masarakan iti Immayos Norte, pukol ti nagpabigbig a mediaman a napan naginspek iti bakeshopna gapu iti alegasion a narugit daytoy.

Kinuna ni Miranda a dimmawat ti peke a mediaman iti P6,000.00 kas sukat iti panangsertipikarna a nadalus ti bakery shop daytoy.

Inted ti biktima ti dinawat ti peke a mediaman nupay adda suspetsana a manglimlimo laeng daytoy.

Itay laeng nabiit, maysa nga opisial ti nagreklamo iti Tawid News nga adda maysa a kameng ti media nga agsursursor kadagiti nadumaduma nga ahensia ti turay nga agsolsolisit iti anunsio para iti pagiwarnakna a lumned-tumpaw.

Iti kallabes, adda pay kameng ti media a nagdawat iti kuarta kadagiti prominente a tattao kas sukat kadagiti write-up nga ipablaakda iti pagiwarnak wenno iti interbioda a maipatangatang iti radio.#