BANTAY, Ilocos Sur – Maysa a babai ti tiniliw dagiti polis gapu ta peke a kuarta ti pinagbayadna kadagiti ginatangna iti maysa a sari-sari store iti Barangay Zone 5, ditoy nga ili idi sardam ti Pebrero 18.
Nainaganan ti suspek a maysa a Leonida Barcellano Alibin, 39, naasawaan, residente iti Barangay Casiber, Santa, Ilocos Sur ngem temporario nga aggigian iti San Julian Norte, Vigan City.
Naammuan ken ni Catalina Otrera y Palos, 37, naasawaan, akinkukua iti sari-sari store a napan naggatang ti suspek iti tiendana ngem peke a P1,000.00 ti pinagbayad daytoy.
Nagpatulong ni Otrera iti barangay captain ket tinengngelda ti suspek sada impaima kadagiti nagresponde a polis.
Narekobre manipud iti suspek dagiti peke a kuarta a pakaibilangan ti tallo a sag-P1,000.00, ken maysa a P500.00.
Naipan ti suspek agraman dagiti peke a kuarta iti police station ti Bantay para iti umisu a dokumentasion.#