Peke nga abono, pestidisio, sinamsam nagsukisok a polis

STA. MARIA, Ilocos Sur – Nadumaduma a klase a pestisidio ken abono ti sinamsam dagiti nagtitipon a bunggoy dagiti polis a nagsukisok iti maysa a warehouse a masarakan iti Barangay Poblacion Sur ditoy nga ili idi aldaw ti Agosto 9.

Sinukisok dagiti nagtitipon nga elemento ti PAIDSOTIG, Intel ISur PPO ken Sta. Maria police nga indauluan ni Police Senior Inspector Sosimo Racho babaen ti direkta a superbision ni Provincial Director Police Senior Supt. Reynante G. Partible, ti maysa a bodega a masarakan iti Poblacion Sur ditoy nga ili ket sinamsamda dagiti nakadulin ditoy a mapapati a peke a tagilako a pestisidio ken abono.

Segun ken ni Fertilizer and Pesticides Authority Provincial Officer Rey Segismundo, maipilaan iti panaglabsing iti PD No. 1144  da Jerome Cabanas y Lanas, 25, baro ken residente iti Barangay Abuor, Narvacan, Ilocos Sur; Emiliana Dato y Bumanglag, 56, naasawaan ken residente iti Barangay Poblacion ditoy nga ili ken Cesar Rabino, residente iti Nueva Ecija.

Kinuna pay ni Segismundo nga awan ti warehouse permit dagiti tagilako a naidulin iti nasao a bodega.

Nasamsam iti bodega ti tallo pedaso a Volcanic Eruption Insecticide; 5 a container nga addaan amarilio a kalub; 3 Speed 5% EC, 11pedaso a  Locan 5 EC; 3 pedaso a United Phosphorous Ltd.; 4 nga amarilio a container nga awanan label; 37 pedaso a Panther 5 EC (1 liter); 50 pedaso a Long Death, 500ML; 50 pedaso a Mango Net, 500ML; 27 pedaso a El Diablo, 500ML; 30 pedaso a Rice and Vegetables, 500ML; 32 pedaso nga Onion, 500ML; 20 pakete a Beewings (powder); 8 pakete a Totmic powder,; 14 pakete a Home Run powder; 7 container a maris pink a nalabelan iti Chinese characters, 500 ML; ken 10 pedaso a Butterflies, 25 ML.

Mapattapatta nga agbalor amin dagiti tagilako a nakumpiska iti bodega iti P466,500.00.

Imet dagiti raiding teams ti search warrant a pinirmaan ni Judge Francisco Ante, Jr. ti MTCC-Vigan City, Ilocos Sur ken insayangkatda ti panagsukisok iti sanguanan dagiti barangay officials.#