Peke nga optometrist, naapput bayat panagamirisna iti mata dagiti biktimana

STA. LUCIA, Ilocos Sur – Naapput ti maysa a peke nga optometrist bayat ti panagtsek-apna iti mata dagiti pasiente iti maysa a pagadalan sadiay Barangay Damacuag ditoy nga ili idi malem ti Oktubre 27.

Tiniliw dagiti polis ti peke nga optometrist nga immuna a nagpammarang a maysa a Dr. Cherish A. Go, kalpasan a naapputda daytoy a mangisaysayangkat iti eye check-up kadagiti pasientena iti uneg ti puraw a luganna iti Damacuag Elementary School.

Sakbayna, idi agarup 2:30 ti malem ti nadakamat a petsa, personal nga inreport da Dr. Shiela Estrada Granada, 40, Presidente iti Optometric Association of the Philippines-Ilocos Sur-Abra Chapter; Dr. Mario Roberto Ablang Granada, 41, Board of Director of Ilocos Sur-Abra Optometric Association Incorporated ken agpada a residente iti Brgy. San Nicolas, Candon City, Ilocos Sur ken Dr. Erlinda T. Custodio, 61, Auditor ti Ilocos Sur-Abra Optometric Association Incorporated ken residente iti Brgy. Banaoang, Santa, Ilocos Sur, a maysa a Dr. Cherish A. Go ti agisaysayangkat iti eye check-up iti nadakamat a pagadalan.

Segun iti polis, saan a rehistrado wenno lisensiado nga optometrist ti suspek a naammuan idi agangay a ni Merlinda Singian y Velasco, 40, naasawaan, ken residente iti Phase 1, Sta. Dolores Street, Villan, Sta. Barbara, Pangasinan kas maibatay iti Cebuana Lhuiller Reward card ken collection receipts no. 17656 ti Magic Appliance Center, INC.

Nakarekobre pay dagiti otoridaditi ikut ni Singian iti uppat a resibo a nagbayadan dagiti kliente para iti orderda nga anteohos nga addaan iti letterhead a nakailanadan ti adres ti mapapati a klinika daytoy iti Pedro Paterno St., Quiapo, Manila.

Kinumpiska dagiti polis dagiti nadumaduma nga aparatus nga inaramat ti suspek a pinangamiris iti mata dagiti klientena sada inkuyog daytoy iti Sta. Lucia District Hospital para iti medical examination ken impan iti police station para iti umisu a disposision.#