Footer

Pelikula nga Ilokano, dakkel ti potensialna: aktor Ronnie Lazaro

VIGAN CITY – Kinarit ti maysa a premiado nga aktor iti teatro ken pelikula dagiti mannurat nga Ilokano nga agsurat kadagiti estoria ken script iti pelikula a mangitandudo iti kultura ken pakasaritaan iti Amianan.

Daytoy ti indagadag ni Ronnie Lazaro, nalatak nga aktor iti teatro ken pelikula bayat ti eksklusibo nga inter-bio kenkuana ti Tawid News Magasin iti Los Mojitos a masarakan iti Heritage Village ditoy siudad.

Ni Lazaro ti kangrunaan a naglektiur iti film acting kadagiti estudiante ti University of Northern Philippines bayat ti Iloco Film Festival a naangay iti daytoy a pagadalan idi Septiembre 27-28, 2010 babaen ti panangilungalong ni Byron Bryant, premiado a direktor ti Indie films ditoy pagilian.

“Mabalinyo ti agpartuat iti bukodyo a pelikula,” kinuna ni Lazaro idinto nga innayonna nga adu dagiti mannurat nga Ilokano a makabael nga agsurat iti script iti pelikula, aglalo kadagiti estoria a pakailagaan ti nabaknang a kultura ken pakasaritaan ti probinsia.

Idi nadakamatmi nga idi ubingkami pay, nakabuyakami iti pelikula maipanggep ken ni Padre Jose Burgos nga Iloko ti panagpatang dagiti agak-akem iti daydi nagkauna a Lyric Theatre, kinuna ni Lazaro a dumur-as pay ti industria ti pelikula no agaramid dagiti Ilokano kadagiti pelikula nga agaramat kadagiti aktor nga Ilokano ken agsaritada iti Iloko.

Tapno maawatan dagiti saan nga Ilokano, insingasingna a maikkan iti Filipino wenno English captions ti panagpapatang dagiti aktor.

Kinuna ni Lazaro a kasapulan laeng dagiti mannurat ti pananginspirarda iti bagida tapno matungpal daytoy nga arapaap nga adda mapartuat a pelikula iti Amianan.

Innayonna a dakkel ti maitulong da Gov. Luis “Chavit” Singson ken ni Gov. Imee Marcos iti pannakabangon ti industria ti pelikula iti Amianan agsipud ta adda essemda iti panagaramid iti pelikula.

Maipalagip a naipasdek ti Experimental Cinema of the Philippines idi tiempo ti panagturay daydi Pres. Ferdinand Marcos ket babaen iti anakna a ni Imee Marcos, napunduan ken nailaksid iti censorship dagiti independiente a pelikula a nakapartuatan dagiti maipagpannakkel a pelikula a kas ti “Oro, Plata, Mata”, ken “Scorpio Nights” ni Peque Gallaga, “Himala” ni Ishmael Bernal, “Misteryo sa Tiwa” ni Abbo de la Cruz ken dadduma pay nga experimental films.

Nagbalin met ni Gov. Singson a producer ti sumagmamano a pelikula ken ditoy Vigan ti nakasiutingan dagiti pelikula daydi Fernando Poe, Jr, a nasinged a gayyemna a kas iti “Ang Alamat” ken “Ang Maestro”.

Kinuna ni Lazaro a maragsakan la ketdi no makabuyanto iti masakbayan iti Ilocano movie iti big screen idinto nga impaganetgetna a dakkel ti potensial dagiti pelikula a maaramid ditoy gapu iti kinapintas ti senario ti Ilocos Region a saan pay a nakitkita ti kaadduan dagiti agnaed iti pagilian.

Kinuna ni Lazaro nga awan ti makitana a problema iti pannakailako dagiti pelikula a partuat iti Amianan agsipud ta adu dagiti Ilokano iti ballasiw taaw a kas iti Hawaii, Estados Unidos, Italia, Spain ken dadduma pay a pagilian a nakigasanggasatan dagiti Ilokano.

Innayon ti premiado nga aktor a kasapulan laeng ti nalaing a director, cinematographer, ken napintas nga script tapno makaparnuay iti maipagpannakkel a pelikula.

Premiado nga artista ni Lazaro ket nangab-abaken kadagiti award. Idi 2008, nangabak ni Lazaro a best actor iti “Yanggaw’ a naisalip iti 2008 Cinema One Originals Digital Film Festival iti babaen ti direksion ni Richard Somes; best supporting actor iti “Bagong Buwan” iti 2001 Metro Manila Film Festival ken “Ataul for Rent” iti Pampelikulang Samahan ng mga Dalubguro (PASADO) idi 2001.

Karaman pay ni Lazaro kadagiti lead actors iti “Brutus” (2009),  Indie film a naisalip iti Cinemalaya ken nangiyalat iti NETPAC Award iti Louis Vitton Hawaii International Film Festival; “Anino” a nangabak iti Short Film Golden Palm iti Cannes Film Festival iti babaen ti direksion ni Raymond Red;  “Manila Skies” ni Raymond Red a naisalip iti 2010 Rotterdam Film Festival, ken Tokyo Film Festival idi 2009;  “Hubad sa Ilalim ng Buwan” a naisalip iti Berlin Film Festival idi 2000; “Panaghoy Sa Suba” a nagbidaan ken direksion ni Cesar Montano a napili a best picture iti International Festival of Independent Films iti Brussels, Belgium; “Baryoke” babaen ti direksion ni Byron Bryant a nangabak iti best cinematography iti 2005 Cinemalaya ken dadduma pay nga Indie films a nagab-abak iti pasalip ditoy pagilian ken iti ballasiw-taaw.

Kabayatanna, impalgak ni Ron Bryant nga inyussuatna ti Iloco Film Festival agsipud ta dakkel ti interesna nga agaramid iti pelikula maipapan dagiti Ilokano.

Maysa kadagiti proyektona ti pannakaiyalis iti pelikula ti maysa nga ababa a sarita ni Juan S.P. Hidalgo, Jr., maysa kadagiti mararaem a mannurat nga Ilokano.#