Pelisitasion para ken ni kabarbaro a Cardinal Quevedo, inaprobaran ti sangguniang panlalawigan

VIGAN CITY – Maysa a resolusion ti inaprobaran ti sangguniang panlalawigan a mangted iti pelisitasion ken ni Arsobispo ti Cotabato Orlando B. Quevedo iti pannakapilina a maysa kadagiti 16 a kabarbaro a Cardinal ti Roman Catholic Church.

Idi Enero 12, impakaammo ni Pope Francis a karaman kadagiti 16 a kabarbaro a Cardinal ni Quevedo, 75, dati a dadaulo ti  Catholic Bishops Conference of the Philippines.

Kas sagudayen ti resolusion nga imbasa ni Bokal Yabes, “maysa a tangsit ken inspirasion ti maysa a padi a nagserbi iti probinsia ti Ilocos Sur iti takemna a kas Arsobispo ti Nueva Segovia, ti panagbalinna a kabarbaro a Cardinal iti Roman Catholic Church iti Pilipinas.

Idi panawen a panagtakemna kas Arsobispo ti Nueva Segovia nga inrusat ni Quevedo dagiti reporma ken panangiduron iti tignay ti kooperatiba tapno tumulong iti pannakaipababa ti kinapanglaw dagiti kailianna babaen ti panangbuangayna iti Nueva Segovia Consortium of Cooperatives a “nagbalin a sibibiag a tawid iti dedikasionna.

Naiyanak ni Quevedo iti Laoag, Ilocos Norte idi 1939. Nagdappat ti pamiliana iti Mindanao bayat ti kinaubingna ket ditoy a nagbasa agingga a simrek iti seminario. Kalpasan a naordenan a padi, nagserbi iti Kidapawan, Cotabato, nagbalin a Bishop of the Prelate of Kidapawan, Bishop of the Diocese of Kidapawan, Archbishop iti Nueva Segovia a mangsaklaw iti Ilocos Sur ken Ilocos Norte ken ti Cordillera Region, sa Archbishop ti Cotabato a pagserserbianna sakbay a napili ni Pope Francis a maysa kadagiti 16 a baro a Cardinal.

Kinuna pay ti resolusion a mapatulodanto ni Quevedo iti kopia para iti pannakaammona ken pammatalged a “makipagmaymaysatayo kenkuana iti panagkararag ken gannuatna a mamagbalin  ti pagiliantayo a nasaysayaat a lugar a pagindegan.

Ni Quevedo ti maikapat a Cardinal ti pagilian, kaunaan iti Mindanao.  Da Luis Antonio Tagle, Archbishop of Manila; Gaudencio Rosales, Archbishop-Emeritus of Manila ken Ricardo Vidal, Archbishop-Emeritus of Cebu dagiti immuna a nadutokan a Cardinal.#