Pension dagiti senior citizen, naited

CABUGAO, Ilocos Sur – Naiyawat ti pension dagiti senior citizens a benepisario ti Social Pension Program ditoy nga ili sadiay Cabugal Cultural and Sports Complex idi Septiembre 26.

Mismo a dagiti pannakabagi ti DSWD Regional Office nga indauluan ni Teresita Emock ken ti MSWDO-Cabugao iti panangidaulo ni Municipal Social Welfare Officer Lydia S. Gazmen dagiti nangiyawat iti pension dagiti benepisario a senior citizens.

Immawat dagiti 220 a benepisario a senior citizens iti sag-P1,500.00 para iti bulan ti Hulio, Agosto ken Septiembre daytoy a tawen. Agawat iti P500 tunggal bulan dagiti benepisario iti Social Pension Program ti DSWD.

Benepisario iti nasao a programa dagiti indigent senior citizens a nakapsuten, masaksakit, addaan iti disabilities ken awanan iti pension wenno pamataudan iti pagbiagda ken agpampannuray laeng iti suportda kadagiti kabagianda.#