Pensionada, nadukotan iti panganan

VIGAN CITY – Maysa a pensionada ti nadukotan iti uneg ti maysa a panganan a nakapukawan iti inruarna a kuarta iti bangko.

Iti panagpulongna iti polis, kinuna ni Filomena Rocilla, 85, naasawaan, pensionada, residente iti Camindoroan, San Juan, Ilocos Sur a dinukot dagiti di pay am-ammo a tattao ti kuartana a P48,000 a naikabil iti petakana.
Segun ti biktima, napanna inruar ti nasao a kuarta a pensionna iti makabulan iti maysa a bangko iti Vigan ket kaduana dagiti annakna ken appona a nagturong iti Jolibee tapno mangaldawda.
Idi agbayad ti baket kalpasan ti panagorderna ti kanenda, natakuatanna laengen nga awan ti petakana a nakaikabilan ti kuartana iti uneg ti bagna.
Malaksid ti kuarta, nairaman a napukaw ti bank book ken dua nga ID ti biktima.
Patien ti baket a nadukot ti petakana bayat ti pannakiliniana idi agorder iti pangaldawda.#