Pensionado, kinabil ti seaman gapu laeng iti kape

STO. DOMINGO, ILOCOS SUR –  Maigapu laeng iti kape, maysa a pensionado ti kinabil ti seaman babaen ti monobloc a plastik a tugaw idi rabii ti Agosto 6 sadiay Barangay Padu Grande ditoy nga ili.

Innaganan dagiti polis ti suspek a ni Georgette Biñan y Tacdol, seaman, agtawen iti 37, baro ken agnanaed iti nadakamat a barangay idinto a nabigbig ti biktima a ni Reynaldo Tacdol y Teofilo, agtawen iti 67, naasawaan, pensionado ken agnaed iti isu met la a barangay.

Iti imbestigasion dagiti polis, napan ni Biñan idiay balay da Tacdol bandang alas dies idi rabii ti Martes iti nadakamat a petsa tapno alaenna ti kapena.

Mapapati a nagsubang dagiti dua a nagtungpal iti panangmalo ti seaman iti lakay a pensionado iti monobloc chairs.

Intaray dagiti kakabagianna ti pensionado idiay Metro Vigan Cooperative Hospital kalpasan ti insidente.

Iti follow-up operation dagiti polis, nakemmeg ti suspek iti uneg ti balayna.#