Petaka a naikabil iti bag, nasikuat iti uneg ti bus

SANTA, Ilocos Sur – Ballaag kadagiti biahero: diyo pampanawan dagiti kargayo iti bus ta uray iti uneg ti lugan, adda dagiti agsipsiput iti kurimesenda a kargamento.

Dandani nakurimes ti kuarta  ni Christopher Dela Cruz, 38, negosiante, ken residente iti Barangay 6, Vintar, Ilocos Norte, nga inkabilna iti bagna no dina nasiputan ti panangsikuat ni Sonny Almo y Peralta, 36, naasawaan, ken residente iti Barangay Solid West, Vigan City.

Segun iti report, agtartaray ti Partas Bus Line iti Sitio San Jose, Barangay Magsaysay District ditoy nga ili idi nasiputan ni Dela Cruz  ti suspek a nangala iti petakana nga inkabilna iti bagna.

Babaen ti tulong dagiti padana a pasahero, natiliw ti suspek sakbay a nakababa.

Kinuna ni Dela Cruz a naglaon ti petaka iti cash money ken napateg a dokdokumento.

Impaima ti drayber ti bus ti suspek iti Santa police station ket naikustodia daytoy para iti umisu a disposision.#