Petision a maipangato ti presio ti karne ti baboy iti P150/kilo napatgan

VIGAN CITY – Maysa nga aldaw kalpasan ti panangkastigar kadakuada ti Sangguniang Panglunsod gapu iti panaglabsingda iti RA 7581 wenno Price Act, naited ti go-signal kadagiti meat vendors a mangingato iti presio ti karne ti baboy manipud iti P140 iti P150 kada kilo.

Napag-aanamongan iti miting nga inangay ti opisina ti ehekutibo babaen ken ni Mayor Eva Marie S. Medina ken dinar-ayan dagiti aglaklako iti karne, agtartaraken iti baboy, city agriculture office, City Agriculture and Fisheries Council (CAFC), chairman ti committee on agriculture,  chairman iti committee on market,  ti pannakaipangato iti P10 kada kilo ti presio ti karne ti baboy, manipud iti P140 iti P150 kada kilo.

Iti telephone interview ti Tawid News Magasin ken ni Konsehal Henry Formoso, kinunana a win-win solusion ti nagbalin a resulta ti nasao a miting a nagpipinnirmaan pay dagiti maseknan iti memorandum of agreement.

Naammuan ken ni City Agriculture Officer Cecilio Acena a dagiti sumaganad ti napag-aanamongan a presio ti liveweight a baboy: 100 kilos and above – P95.00, 90-99 – P93.00, 80-89 – P91.00, 70-79 – P89.00.

Dagiti takong: Class A – P80.00 ken Class B – P70.00. Dagiti nadisgrasia wenno nagsakit – P60.00.

Sakbay ti miting, kinuna ni Vice Mayor Franz Ranches a nagtutulaganda iti konseho nga ikkanda iti blanket authority ti executive department ket respetarenda aniaman a desision a maaramid iti miting.

“Tapno saanen a paatiddogen ti proseso, intedmin dayta nga statement…,” kinuna ni Ranches.

Ngem kinuna ti maysa a makitkitienda a dina kayat ti painaganan a mapampanuynoyan laeng dagiti meat vendors agsipud ta napatgan a dagus ti petisionda iti baet a dida inikkan iti respeto ti konseho ti siudad gapu iti panangipangatoda lattan iti presio ti lakoda a karne ti baboy a di pay naaksionan ti petisionda.

Iti kellaat a panangipangato dagiti aglaklako ti presio ti karne ti baboy idi Pebrero 17, Domingo, adu nga aggatgatang ti nagreklamo ket dimmanon daytoy iti imatang ti konseho ti siudad.

Bayat ti session idi Pebrero 18, iti sanguanan dagiti meat vendors nga indauluan ni Dionnie Pre, presidente ti gunglo, dinawat ni Ranches ti panangipababa dagiti meat vendors iti presio ti lakoda a karne iti baboy iti dati yantangay adda miting nga angayen ti ehekutibo tapno marisut ti problema.

Idi damo, impangta dagiti meat vendors ti panagsardengda nga aglako idinto nga inkalinteganda nga agpukawda no isublida ti presio iti dati a P140.

Binabalaw pay dagiti meat vendors ti konseho gapu iti kinaawan aksion ti konseho iti panangipangato met ti chicken section iti presio ti manok.

“Ania koma ti pagdumaanmi, ti meat section ken chicken section, parehas kami…” kinuna pay ni Pre. 

Nagpadispensar met laeng ti grupo ken immannugotda nga isublida iti dati a presio ti lakoda a karne ti baboy kalpasan ti panangibatad ti bise mayor a mabalinda a maidarum gapu iti panaglabsingda iti RA 7185 wenno Price Act. Kinuna met ni Konsehal Ever Molina nga agdarum no ipetteng latta dagitoy ti panaglakoda iti P150 kada kilo iti baet nga awan pay aksion ti konseho iti petisionda.

Segun iti bise mayor, sagudayen ti Price Act a saan a mabalin ti automatic increase, ket mabalin a maidarum ti naglabsing ken mapakatan iti penalty a pannakabalud iti saan a nababbaba iti lima a tawen ngem saan a nalablabes iti 15 a tawen wenno mamulta iti saan a nababbaba ngem P5,000 ken saan a lumbes iti P2 milion, depende iti kadagsen ti panaglabsing.

Kinuna pay ni Ranches nga awanton ti kontrol ti konseho no adda maysa a concerned citizen a mangipila iti kaso maikontra kadagiti meat vendors a nangingato iti presio ti karne ti baboy nga awan ti pammalubos ti konseho.#