Petision dagiti meat vendors a maingato ti presio ti karne ti baboy, napatgan

VIGAN CITY – Kalpasan ti nasurok makalawas a panangadalna, pinatgan ti sangguniang panlungsod ditoy ti petision dagiti meat vendors a maingato ti presio ti karne ti baboy nga ilakoda iti tiendaan publiko ditoy siudad.

Impakaammo ni Konsehal Benjo Verzosa, chairman ti committee on market, a maingato ti presio ti karne ti baboy iti P180 kada kilo.

Nupay kasta, adda kondision nga intuding ti sangguniang panlungsod: iti kanito a bumaba ti presio ti liveweight a baboy iti P120 ken agpababa kada kilo, ibaba met dagiti meat vendors ti presio ti karne ti baboy iti P170 kada kilo.

Agepekto ti baro a presio ti karne ti baboy a mailako iti tiendaan publiko apaman a mapirmaan dagiti meat vendors ti memorandum of agreement ken maisubmiteda iti sangguniang panlungsod.

Kanaig daytoy, maysa nga agparparti iti baboy ti nagkuna a mapnekdan iti pannakaingato ti presio ti karne ti baboy iti P180 kada kilo.

Sakbayna, nagpetision dagiti meat vendors a maingato ti presio ti karne ti baboy agsipud ta maluglugida gapu iti nangina a panaggatangda iti liveweight a kinunada nga agtartaray iti P125-127 kada kilo.

Ngem nagpaparti ti committee on market iti baboy tapno maammuan no pudno ti irakrakurak dagiti meat vendors nga agpukawda iti agdama a presio ti karne ti baboy a P170 kada kilo.

Segun iti konsehal, natakuatanda nga iti presio a P170 kada kilo iti baboy a liveweight a nagatang iti P115 kada kilo, agganansia pay laeng dagiti aglaklako iti P1,500.00; no mailakoda iti P180 kada kilo, agganansiada iti P2,400.00 ket iti P190 kada kilo, agganansiada iti P3,276.00.

Kinuna ni Verzosa a no magatang ti liveweight a baboy iti P120 ket mailakoda iti P170 kada kilo, agganansia dagiti meat vendors iti P1,100.00; no mailakoda iti P180 kada kilo, aggansiada iti P1,948.00; ket no P190 kada kilo, P2,796.00.

Innayon ti konsehal a no nagatang ti liveweight iti P125.00 kada kilo ket mailakoda iti P170 kada kilo, agganansia pay laeng dagiti meat vendors iti P620.00; no P180 ti pakailakuanda kada kilo, agganansiada iti P1,465.00  ket no P190 kada kilo, agganansiada iti P2,316.00.

Kinuna ni Verzosa a maysa met a negosiante, a nasurok laeng a P699.60 ti suma total ti expenses dagiti meat vendors manipud iti pannakaparti ti baboy agingga iti pannakaipanna iti tiendaan tapno mailako.

Immun-una ngem daytoy, babaen ti privilege speech, linagidaw ni Konsehal George Villanueva ti panaglaok dagiti karne ti baboy nga addaan tulang ken puro lasag a mailaklako iti tiendaan publiko ti Vigan.

Ngem alegasion dagiti meat vendors a no dida paglaoken dagiti lakoda a karne nga addaan tulang ken lasag,  agpukawda iti presio a P170 kada kilo agsipud ta ngimmina ti presio ti gatangenda a liveweight a baboy.

Kinuna dagiti meat vendors a manipuden iti P120 agingga iti P127.00 ti presio ti liveweight a baboy ket saandan a maparuar no saanda nga ilaok dagiti karne nga adda tulangna kadagiti puro lasag.

Dinawat ketdi dagiti meat vendors ti pannakaingato ti presio ti karne ti baboy manipud iti P170 iti P190 kada kilo.

Ngem nangiparuar ni Vice Mayor Lourdes Baquiran iti pammilin kas agdama idi a mayor a nangisuno ken ni Mayor Eva Marie S. Medina bayat ti kaawan daytoy, kadagiti aglaklako iti karne a saanda nga ilaok dagiti karne nga adda tulangna kadagiti puro a lasag ken panangsurotda iti presio a P170 kada kilo.

Kas reaksionda, awan ti meat vendors a naglako iti karne ti baboy idi Marso 21 a nakaigapuan ti panagriri dagiti consumers, nangruna dagiti pasdek-negosio a pakaibilangan dagiti restaurants ken otel.

Ngem impatengteng ti sangguniang panlungsod nga status quo ti presio ti karne ti baboy ken saan nga aglaok dagiti adda tulangna iti puro lasag.

Imballaag pay dagiti konsehal a maipakatan iti sanction ti asinoman a meat vendors a saan a mangitaltalek iti status quo order ti sangguniang panlungsod.#