Footer

PGIS, Madrigal Foundation, nagpinnirma iti MOA para dagiti proyekto ti probinsia

MAKATI CITY- Maysa a memorandum of agreement ti napirmaan iti nagbaetan da Gov. Deogracias Victor “DV”  Savellano ken Ms. Maria Ferl Lalaine Madrigal, chairperson ti MFLM Madrigal Foundation, idi Nobiembre 8, 2007 para iti pannakaipaay iti naan-anay a tulong ken suporta kadagiti proyekto ti gobernador.

Kinuna ni Savellano nga adu a taga-Ilocos Sur ti mabenepisiaran itoy a panagkinnamayyet ti probinsia ken ti MFLM Foundation babaen ti nasao nga MOA.

Kinuna met ni Madrigal nga  agtultuloy a tumulong iti gobierno probinsial ti Ilocos Sur nga awan a pulos ti dawatenna a kasukat.

Kinuna ti gobernador a karaman iti MOA ti microfinancing wenno panagpautang iti 4% iti programa ti provincial government iti benneg ti livelihood.

Kinunana nga iti met education  ken public information, pagtinnulongan dagiti ti gobierno probinsial ken ti foundation a maital-o ti kalidad ti panagisuro  iti probinsia babaen ti panangipaay iti libre a training ken seminar kadagiti mangisursuro, kasta metten ti agtultuloy nga scholarship program para kadagiti estudiante.

Innayon ti gobernador nga igannuatda ti panagmula iti kawayan iti igid ti karayan ken mangrove iti kabaybayan nga agserbi kas proteksion iti pannakadadael dagiti lugar a dalanan ti danum kas paset ti programa ti gobierno probinsial a panangsaluad iti aglawlaw.

Mangisayangkatda met iti panagsanay para kadagiti trainors ken coaches ken iyendorsoda ti sports nga archery ditoy probinsia tapno pumintas ti sports development idinto a ti panagtultuloy ti Project KABSAT ken supplemental feeding ti maipangruna iti social services ken publi health, segun pay ken ni Savellano.

Kabayatanna, inyawat pay ni Madrigal itoy met laeng nga okasion ti agduduma a post production equipments para iti National Broadcasting Network, ti estasion ti telebision nga imatonan ti PGIS.

Inkari pay ti pilantropo ti panangipaayna iti uniporme ken lugan ti estasion tapno naannayas ti operasion ti estasion a makatulong iti pannakaiwaragawag dagiti proyekto ken programa iti probinsia. (Mancielito S. Tacadena, NBN Vigan)