Tawid News Magazine

PGIS nangidanon iti P2 million relief goods kadagiti biktima ti Taal eruption

Members of the PDRRMC and employees of PGIS delivered the relief goods to Batangas province (photo from the Gov. Ryan Luis V. Singson Official FAN PAGE)

VIGAN CITY — Impatuloden ti Provincial Government of Ilocos Sur dagiti adu a naurnong a tulong wenno relief goods para kadagiti rinibu a biktima ti panagbettak ti Bulkan Taal sadiay Batangas.

Indauluan ni Governor Ryan Luis Singson dagiti opisial ti Provincial Government ti pannakaipatulod dagiti nagduduma a relief goods para kadagiti nadidigra iti panagbettak ti bulkan.

Naipatuloden dagiti relief goods nga aggatad iti nasurok a P2 million iti sango ti Provincial Capitol iti daytoy a siudad idi Enero 20, 2020.

Naitulod dagiti relief goods pakairamanan dagiti adu a taraon babaen kadagiti kameng ti Provincial Disaster Risk Reduction Management Office (PDRRMO) iti panangidaulo ni Engr. Michael Chan, ken nayawatda iti maseknan nga opisial ti Batangas Provincial Government a mangidanonton kadagiti evacuation centers.

READ: Panagtitinnulong dagiti Pilipino iti panawen ti panagbettak ti Bulkan Taal

Iti mensahe ni Gov. Singson, impaganetgetna ti kinapateg ti panagtitinnulong dagiti lokal a gobierno ken amin a Pilipino iti panawen ti didigra tapno masaranayda dagiti biktima ti kalamidad kas ti napasamak sadiay Batangas.

Impalagipna nga idi nagsagaba met ti Ilocos Sur iti didigra kadagiti naglabas a napigsa a bagyo kas ken ni Bagyo Ompong ket adu a lokal a gobierno iti sabali a probinsia dagiti simmaranay kadagiti nadidigra nga umili iti Ilocos Sur.

Kiniddawna ti agtultuloy nga itutulong ken pannakipagrikna dagiti taga-Ilocos Sur kadagiti biktima ti didigra kas nasayaat nga aramid ti pudno a Kristiano ken makipagili.

Kalaksidan ti Provincial Government, adu pay dagiti nagduduma a local government units iti Ilocos Sur dagiti nagkolekta ken nagidonar iti tulong para kadagiti biktima ti panagbettak ti Bulkan Taal.

Uray dagiti nagduduma a non-government organizations agraman ti Caritas Nueva Segovia ti Iglesia Katolika iti Ilocos Sur ket nagawat ken nangidanon met ti tulong para kadagiti adu a biktima ti Bulkan Taal.

Agingga ita ket agaw-awat pay laeng ti Caritas Nueva Segovia kadagiti donasion para kadagiti biktima ti Bulkan Taal a maitulodto iti Arkidiosesis ti Lipa, Batangas a mangiwaras kadagiti biktima ti didigra. ●

Exit mobile version