Footer

PGMA, imbilinna ti reinbestigasion iti shabu drug bust iti La Union

SAN FERNANDO CITY – Imbilin ni
Pres. Gloria Macapagal-Arroyo ti sabali nga inbestigasion mainaig iti
naraut a laboratorio ti droga iti sanguanan ti pannakadismis ti kaso
dagiti polis a mapapati nga adda pannakainaigda iti operasion ti
nasao a laboratorio.







Imbilin daytoy
ti Presidente bayat ti press conference kadagiti kameng ti media iti
rehion a naangay iti
Thunderbird
Hotel Veranda iti Poro Point, ditoy siudad kalpasan ti closed-door
meetin ken ni
Bishop
Artemio Rillera
.

Kinuna ni Dangerous Drugs Board
(DDB) chair Vicente Sotto nga imbilin ni Pres. Arroyo ken ni
Provincial Prosecutor Danilo Bumacod ti panagtinnulong ti DDB ken ti
Philippine Drug Enforcement Agency a mangmonitor iti maituloy nga
inbestigasion mainaig iti shabu lab tapno maipakat ti pannusa
kadagiti tattao a nainaig iti operasionna.

Kinuna pay ni Sotto a kiniddaw ni
Bishop Rillera ti pannakaisubli ti kaso manipud iti Department of
Justice iti Manila iti probinsia.

Imbilin ni Arroyo ti pannakaiwayat
ti reinbestigasion babaen ti provincial prosecutor’s office ditoy.

Rinaut dagiti nagtitipon a bunggoy
dagiti polis ti nasao a laboratorio ti droga idi Hulio 9 idi
napalabas a tawen ket nakasamsamda kadagiti ramramit ken kemikal a
maaramat iti droga a mapattapatta nga aggatad iti maysa a trilion.

Kuna dagiti autoridad a daytoy ti
kadakkelan a shabu bust iti pakasaritaan ti pagilian.

Innem a tattao a pakairamanan da
Pol. Supt. Dionisio Borromeo, PO3 Joey Abang, PO2 Walter Banan ken
PO1 Rodolfo Damian ti nasaklangan iti kaso gapu iti mapapati a
pannakainaigda iti nasao a laboratorio ti droga.

Ngem imbasura ti Department of
Justice ti kaso maikontra iti lima kadagiti innem a suspetsa.

Ni laeng Joselito Artus, mapapati
a caretaker iti nasao a laboratorio ti droga ti naisaklangan iti
kaso.#