PhilHealth accreditation ti ospital, maipagpagna

NARVACAN, Ilocos Sur – Ipagpagna ti baro a pangulo ti district hospital ditoy ti pannakaisubli ti akreditasion iti Philhealth ti ospital tapno ad-adda pay a matulongan dagiti marigrigat a pasiente.

Segun ken ni Dr. Pablo Quedado, baro a hepe ti Central Ilocos District Hospital, naibabawi ti akreditasion ti PhilHealth daytoy gapu ta agkurang dagiti pasilidadna iti napalabas.

Kinuna ni Quedado a kumpleton dagiti pasilidad ti ospital ket manamnama a maikkan iti akreditasion ti PhilHealth daytoy.

Pito nga ili ti sakupen ti nasao a district hospital a pakairamanan ti Narvacan, Santa, Nagbukel, Sta. Maria, Burgos, ken San Esteban ken Santiago.#