Philippine Super Liga Spikers, nagay-ayam iti Ilocos Sur

STO. DOMINGO, Ilocos Sur – Rinibu dagiti napan nagbuya iti ay-ayam iti volleyball iti People’s Coliseum ditoy nga ili idi Oktubre 25.

Iti alas kuatro ti malem iti nadakamat a petsa a naangay ditoy nga ili ti provincial games ti 2014 Philippine Super Liga Grand Prix a nagsanguan ti Petron Blaze Boosters ken Mane ‘n Tail ken ti Generika Lifesavers ken RC Cola-Air Force Raiders.

Iti daytoy a panagsango dagitoy a teams, inabak ti Petron Blaze Boosters ti Mane ‘n Tail babaen iti three sets idinto a dinaleb ti RC Cola-Air Force Raiders ti Generika Lifesavers babaen iti uppat a set.

Kinuna ni Gov. Ryan Singson a dakkel nga inspirasion dagiti lokal a bomabalibol iti probinsia ti pannakaangay iti dua nga ay-ayam ti Super Liga ditoy Ilocos Sur.

Plano ti gobierno probinsial ti mangangay iti inter-town volleyball tournament, segun iti gobernador.#