PhilRice, BFAR, ibinglayda ti kinaekspertoda iti BaRangay demo farm

SAN JUAN, Ilocos Sur – Impatalged ti PhilRice Batac ken ti Bureau of Fisheries and Aquatic Resources nga itedda ti kinaekspertoda para iti naan-anay a panagballigi ti demonstration farm ti gobierno probinsial ditoy nga ili.

Kinuna ni Amelita Palanggoy, Accounting Specialist ti PhilRice Batac, a pakaragsakan ti grupoda ti pannakaited ti maysa a paset ti BaRangay demo farm para iti ahensiada.

“Idi, daldalananmi laeng daytoy a lugar a nakatiwangwang. Kunkunami a sayang daytoy. Mangnamnamakami ita nga iti panagtitinnulong ti amin nga ahensia ken ti provincial government, nasayaat ti pagbanagan daytoy a demo farm.” kinuna ni Palanggoy.

Nagmula iti kayo nga agbunga, saba ken agduduma ti klasena a natnateng dagiti empleado ti PhilRice Batac iti demo farm ditoy idi Pebrero 7 kas panangipakitada iti naan-anay a suporta ti ahensiada iti daytoy a proyekto ti agrikultura ni Gob. Deogracias Victor Savellano.

Kabayatanna, kinuna met ni Regional Director ti Bureau of Fisheries and Aquatic Resources (BFAR) Nestor Domenden nga ibinglayna ti kinaekspertona iti panagtaraken iti lames tapno adda provincial fish hatchery a maipasdek iti demo farm.

Kinuna ni Domenden nga iti pannakaipasdek ti nasao a hatchery iti demo farm, masupusopan ti pagkurangan iti ikan ditoy probinsia.

“Double purpose ti kitkitaek ita a pagbalinan ti fish pond ditoy. Mapupokan daytoy tapno adda pagalaan iti fingerlings. Iti sabali a bangir, napintas a pagsibog ti  waste water nga aggapu ditoy  kadagiti mula ta fertile dagitoy. Makatulong iti problema ti irigasion ditoy,” kinuna ni Domenden.

Innayon ni Domenden a mayataday daytoy a proyekto ni Savellano iti programa ti gobierno nasional ken ti Departamento ti Agrikultura ket no ipakat dagiti mannalon ti makitada iti demo farm, sumayaat ti panagbiagda.#