Footer

PHO: Maysan a HIV treatment hub ti GSGH; kaso ti positibo iti HIV, umad-adu

VIGAN CITY – Agtultuloy ti panagdur-as dagiti ospital nga imatonan ti Provincial Government nangruna ti Gabriela Silang General Hospital, a maysan a treatment hub kadagiti positibo ti Human Immune-defficiency Virus (HIV) a gapu ti makapatay ken saan pay a maagasan a sakit nga Acquired Immune Defficiency Syndrome (AIDS).

Daytoy ti impakaammo ni Dr. Carmeliza Singson, Provincial Health Officer, kadagiti kameng ti Ilocos Sur Integrated Press kabayatan ti pannakiumanda kenkuana iti Kapihan iti Amianan Media Forum.

Impakaammo ni Dr. Singson nga agtultuloy dagiti madukduktalan a positibo iti HIV iti Ilocos Sur, ken adda kaudian a baro a 20 a kaso. Kinompirmaranna nga iti kadagupan dagiti naka-record a kaso ti HIV iti Ilocos Sur, ket kaaduanna dagiti agindeg iti Vigan City. Kinanunonganna a maysa a gapu ti panagadu ti HIV cases ti Ilocos Sur nangruna iti Vigan City ket gapu ti panagdur-as ti turismo iti siudad kalpasan ti panagbalinna a World Heritage Site ken maysa kadagiti New Seven Wonder Cities of the World.

Inlawlawagna a dagiti siudad ken dadakkel nga ili iti Ilocos Sur ket addaan iti kaso nga HIV positive. Impakaammona a kaaduan kadagiti nai-report a kaso ti HIV ket naala babaen ti “same-sex relations” wenno seksual a panagnaig dagiti dua a lallaki.

Inlawlawag ni Dr. Singson a malisian ti nakaam-amak nga HIV – AIDS babaen ti nadalus a panagbiag wenno “clean living,” panagbalin a loyal wenno napudno iti asawa wenno kapareha, ken natalged a pannakinaig iti seks. Impakaammona a napagbalin ti GSGH a HIV treatment hub tapno matulongan dagiti taga-Ilocos Sur nga agsagsagaba iti daytoy a sakit, ken saandan a mapan sadiay Metro Manila, ken tapno malapdan ti panagadu ti daytoy a sakit, nga iti intero a Pilipinas, ket adda 31 a baro a kaso ti HIV positive iti inaldaw a maibilang a kapartakan iti South East Asia.

Impalgakna nga addan dagiti pasiente a taga-Ilocos Sur a nalimed nga agpapaagas iti GSGH, ken “confidential” ti kinataoda. Inawisna dagiti umili nga addaan iti “risk factor” iti sakit a mabalinda ti libre nga agpa HIV test iti GSGH, ken impasingkedna ti naan-anay a pannakailimed ti kinataoda, ken nasayaat a pannakatamingda.

Inrakurak pay ni Dr. Singson ti agtultuloy a napasayaat a serbisio ti GSGH ken dagiti amin a district hospitals iti Ilocos Sur iti pannakataming dagiti pasiente nangruna dagiti napanglaw. Impakaammona ti pannakapadur-as dagiti pasilidad, alikamen, laboratorio ken nagduduma a serbisio tapno mapalag-anan dagiti pasiente. Pinagyamanna ti agtultuloy a suporta ti Provincial Government iti pannakapadur-as dagiti amin nga ospital ti gobierno iti Ilocos Sur tapno mapasayaat ti serbisioda kadagiti umili.  (Eden Alviar)

, , , , ,