Footer

Pidpid Water System, nainaguraran

STA. CRUZ, Ilocos Sur – Nasolbaren ti problema dagiti agindeg iti Pidpid ditoy nga ili iti pangalaanda iti danum nga inumen kalpasan a naipasdek ti maysa a water system iti barangayda.

Nainaguraran itay Nobiembre 4 ti Pidpid Water System a nagtitinnulongan a pinunduan ti Swiss Agency Development and Cooperation, Northern Philippines Tribal Community Development Center, gobierno probinsial ti Ilocos Sur, lokal gobierno ditoy, ken dagiti bumarangay ditoy.

Kinuna ni Rock Baquitan nga iti pannakaipasdek ti water system iti lugarda, nasolbaren ti problemada iti pangalaanda iti danum nga inumen ti sibubukel a barangay.

Iti met panagsarita ni Gob. Deogracias Victor “DV” Savellano, binigbigna ti maaramidan daytoy a proyekto a nagtitinnulonganda a maipasdek para kadagiti umili nga agnaed iti nasusulinek a lugar.

Kinunana a sisasagana ti opisinana a makitinnulong iti aniaman a proyekto babaen ti counterparting scheme.

Kabayatanna, dinawat ni Swiss Ambassador Peter Sutter nga ilalaen dagiti agindeg ti proyekto a naipaay kadakuada.

“Ilalaenyo ta dakayo a mismo ti nangipasdek, ling-etyo ti puonan tapno maipatakder daytoy a proyekto. Laglagipenyo a biag ti katukad ti napaadda a nadalus a danum iti lugaryo,” kinuna pay ni Sutter.#