Pigad

Umuna a paset

Sarita ni Jobert M. Pacnis

 

 

URAY la napaangek ni Gimpol idi kugtarak ti bakrangna. Iti panagdardarasko, diak nakita ti kaaddana iti pagpigadan iti ridaw. Ngannganiak la ket ngarud naitikleb a nakasagud kenkuana. Naimbag ta nakakapetak iti bakrang ti balay.

Umanang-ang a nagtaray ni Gimpol. Di payen timmaliaw. Ngem pinakamatak pay la iti sao a kasla ketdin maawatanna. “Sinalbagka! Natnag la a narugitan dagitoy iggemko, papartika!” Diak kayat ti karne ti aso!

Dagiti papelko a maki-assesstment iti high school ti kayatko a sawen. Nakaikaranukon la dagitoy iti plastic a dadael ti ziplock-na. Numona ket bomba ti danum iti masanguanan. Di pay ket awanen nagmamaayanda no naiwarasiwas iti kadanuman?

Iti panangkugtarko ken Gimpol, nairaman a simmiag ti pagpigadan—a kapilitan a pinidutko nga implastar. Bay-ak latta koman ta isu pay a pakataktakak ngem isunto manen a pamunganayan ti panagsasao ni baket no adda makitana nga awan iti plastarna ditoy balay. Koma no di kasla masinggan ti ngiwatna.

Imparabawko iti motorko dagiti pappapelko. Plinastarko ti pagpigadan a lupot. Permi a dutdot ti aso. Ken nakadagdagan.

“Ayna, Gimpol…” indayamudomko. Ngem diakon makita ti anniniwanna. Nagbuggoak iti bomba.

Sinakayak ti motorsiklok kalpasanna. Iggem ti maysa nga imak dagiti papelesko. Naimbag ketdi ta saan a de-clutch ti luganko. Diak ket koman maguantaan nga iggaman dagiti igamko a maki-assess. Ibagko koma ida itay ngem ‘nak-ti-diaske dagita a kabbalay ta nginutngotanda ketdin ti sakbatanna. Kakaisuna pay met a backpack-ko— a kadagitoy laeng manen a  mairuar kalpasan daydi panangusarko itay napan a tawen a pannaki-assess-ko latta.

Diak payen makagatang iti baro tapno adda koma met kasukatna. Ania ketdin a kinaagbabakol ti adda a kasasaad.

Isu a no dadduma, kaykayatko payen ti agpuppupok iti balay ta adu ngamin ti di mamati nga awan mayap-ap-ap iti bolsa.

“Sika pay, maestro?” sangkakunada. A kasla ketdin adu ti urnongko idinto nga awan met pay ti napia a nagtrabahuan.

Adda pay dagiti awis a manganakak iti buniag. Ngem diak mapan ‘ton madanonan ta awan met pagbayad idiay simbaan a kas panganak. Ken siempre, masapul nga adda met ipapetpet iti anak-ti-buniag inton agpakadakan. Nakababain nga awan. Isu nga agparnuayak latta no kuan iti nabaked a rason.

Naannayas ti panagpatarayko iti motorsiklok idi addaakon iti haywey. Sipud adda puotkon, kastoyen nga aspalto laeng ‘toy kalsada nga agturong iti sentro. Nakaad-adu payen ti abutna a natapalan. Pagdaksanna, ‘diay naitapal a semento, kasla met bunton kangato no palausen ti manarita. No dimo kabisado, sigurado a maitaltagka. Napia laeng no dika maitar-ap.

Masdaawak met ketdi no apay a di laengen masemento dagiti dalan nga agpalaud ken agpadaya manipud iti sentro. Idinto a dagiti kankanto iti puseg ti ili, kasla ‘tay balasang a kanayon nga agsukat.

Sabagay, nanumo laeng ti ilimi. Bassit la siguro ti IRA-na. Ket dayta, no adda proyekto, maipokus iti sentro.

Ngem adda met ketdi kinabaknang ditoy ilimi. Namsek iti magnetite ti aplayami. Laeng, saan a makastrek dagiti agminminas ta dimi palubosan nga umili.

No sugal, kas kadagiti kadarapat nga ili, ay, di met maaw-awan. Hueteng ti numero uno. Agkaraiwara dagiti kobrador. Awan pilpilienda a pasdek— kuerpo ti polisia, health center, emergency hospital, munisipio, ken ilabasda kadagiti lugar ti pagdaydayawan. Diak la ammo no itanamitimda a makapangabakda koma wenno adda met agtaytaya iti uneg. Pakawanennak, Apo.

Iti munisipio ti immuna a tinurongko. Agpasedulaak.

Alas otso media ti oras iti selponko (wen, awan pay relok uray dagiti tagilakaen la koma).  Ngem iti iseserrekko iti munisipio, inawagannak ti nakatugaw a babai iti sango ti lamisaan iti kanawan.

“Umayka pay ag-register, barok,” kinunana.

Idi laeng a mabasak ti naipigket a papel a nakailanadan ti Information iti sango ti lamisaanna. No kasta, empleado ti babai—a nupay kailiak, diak ammo ti naganna. Ken ita la a makitak.

Nasdaawak. Ita man pay nga adda kastoy iti munisipio, nakunak iti nakemko. Idi, agdiretsoka lattan iti uneg ket ibagam kadagiti madanonmo ti rantam. Itudodanto lattan ti kaduada a makaited iti kasapulam no dim’ pay am-ammo.

Insuratko ti nagan, adres, mabilang, oras ken rantak iti logbook nga inyawat ti babai.

“Agurayka pay laeng dita uneg,” kinuna ti babai idi mabasana ti rantak. “No saan, dita…” insungona ti parke iti sango. “Awan pay mangasikaso iti kasapulam. Di pay simrek…”

Intallikudko ti semsemko. Awan pay ti agpasedula? Paggapuanna ngata? Iti kasulinekan a barangay ti ilimi? Ngem ania pay ti oras?

Ania ket ngaminen ti pannakairanranana a naibus ti sedula iti barangaymi idi napanak idi malem-kalman.

“’Diaykanto la munisipio a mangalan, maestro,” kinuna ti sekretariomi.

Napanak nagtugaw iti kubo iti parke iti ballasiw ti kalsada. Nalawag a makitak ditoy dagiti empleado a sumrek.

Apaglabes nga alas nuebe idi payapayannak ti empleado iti Information.

“Addan,” kinunana idi maasitgak.

Nagyamanak. Inasitgak ti impatuldona nga empleado. Nagdaydayawak. Baro pay nga empleado iti panagkitak (baro kunak ta saan met nga isu idi immayak manen nagpasedula itay napan a tawen). Ngem malasinko! Dita laeng sango ti merkado ti balayda.

Imbagak ti rantak.

“Agurayka laeng,” kinunana. Panglukmegen a babai nga iti tantiak, apaglabesna a kuarenta. Natayag; pagat-abaga ti buokna. Sobra ti pudaw (a madlaw a gapuanan dagitay maiyad-advertise a pagpapintas) ti rupana, saan a maibagay iti ngumisit a sikona; ken nakalablabbasit dagiti bibigna. Insungona ti tugaw iti sangok.

(Adda tuloyna)